بىرىككەن اراب امىرلىكتەرىندە وقۋشىلار ونلاين ءبىلىم بەرۋگە كوشىرىلدى

استانا. قازاقپارات - بىرىككەن اراب امىرلىكتەرىنىڭ ءبىلىم جانە ادام دامۋى جونىندەگى باسقارماسى مەكتەپ وقۋشىلارىن ونلاين وقىتۋعا العاشقى ليتسەنزيا بەردى، دەپ حابارلايدى قازاقپارات ازەرتادج- عا سىلتەمە جاساپ.

ليتسەنزيا Dwight Global Online School مەكتەبىنە بەرىلگەن.

بۇل باستاما «دۋباي 10X» باعدارلاماسى اياسىندا ىسكە اسىرىلىپ جاتقان Rahhal جوباسىنىڭ ءبىر باعىتى. بۇدان بىلاي، ب ا ءا- دە بالانى ونلاين وقىتۋعا اۋىستىرۋ مۇمكىندىگى تۋادى. الدىن الا دەرەك بويىنشا، بۇل ءداستۇرلى ءبىلىم بەرۋمەن سالىستىرعاندا الدەقايدا ارزان بولادى.

ءبىلىم جانە ادام دامۋى جونىندەگى باسقارمانىڭ شىعارماشىلىق، باقىت جانە يننوۆاتسيالار ءبولىمىنىڭ باسشىسى حيند ال مۋاللانىڭ مالىمەتىنشە، ۆيرتۋالدىق ءبىلىم بەرۋ باستاماسى توعىز اي بويى سىناقتان وتكىزىلەدى.

دۋبايداعى Dwight Global Online School ونلاين ءبىلىم بەرۋدى 7-12 سىنىپ وقۋشىلارىنا ۇسىنىپ وتىر. وندا ونلاين رەجيمىندەگى ساباقتار، ۆيرتۋالدى سىنىپتار، ۆيدەو، الدىن الا جازىلعان دارىستەر بويىنشا وقىتۋ، سەمينارلار جانە تاعى باسقاسى قاراستىرىلعان. ونىمەن قوسا، ساباقتار كۇن سايىن ەمەس، اپتاسىنا ەكى-ءۇش رەت وتەدى جانە ءار سەمينار تاسپاعا جازىلىپ، كەيىن قايتا كورۋگە مۇمكىندىك بولادى.