سپورت سىيلايتىن باقىت
كوپشىلىكتىڭ ۇيعارىمىندا شىنايى باقىت دەگەن - ءوز ارمان- تىلەكتەرىنىڭ اقيقات ومىردە جۇزەگە اسۋى. ال راسىندا سولاي ما؟ العا قويعان ماقساتتارىڭ، جوسپارلاعان دۇنيەلەرىڭ ەش كەدەرگىسىز جۇزەگە اسسا، قۋانىش سىيلايتىنى راس. بۇل دا باقىتتى ءبىر ءسات. ەڭبەك - باقىتقا جەتەلەيدى. تالماي، تىنباي ەڭبەك ەتكەن جاننىڭ نەسىبەسى كەم بولعان ەمەس. كەز كەلگەن ءىستىڭ قايىرىن كورىپ، راقاتىن سەزىنەدى. ادام ءوزىن باقىتتى سەزىنۋ ءۇشىن نە ىستەۋ كەرەك؟
قاراپايىم مىسالداردى- اق الىپ قارايىق. پەندە بولعاسىن، كوڭىل تولمايتىن دۇنيەلەر بولادى. "نەگە سەمىرىپ بارامىن"، بولماسا "تەز شارشاپ قالامىن" دەگەن سۇراقتى ويلاپ تا ادام جابىرقاۋى مۇمكىن. ال بۇل سۇراقتاردىڭ جاۋابى - سپورتتا. كۇندە بولماسا دا، اراگىدىك فيزيكالىق جاتتىعۋلار جاساۋ - ادامدى سەرگىتەدى. بويعا كۇش- قۋات ءبىتىرىپ قانا قويماي، پسيحولوگيالىق كوڭىل- كۇي رەتتەلەدى. كۇيزەلىستى جەڭۋگە كومەكتەسەدى. بۇل عىلىمي تۇرعىدان دا دالەلدەنگەن. ادام دەنە جاتتىعۋلارىمەن اينالىسقان ساتتە ونىڭ ميىندا دا سان مىڭداعان ۇدەرىستەر بولادى. مي دەنە قيمىلدارىنىڭ ارەكەتىن كۇيزەلىس رەتىندە قابىلداپ، وعان قارسى كۇرەس جۇرگىزە باستايدى. اعزادان ەندورفين گورمونى (قۋانىش پەن ءلاززات الۋ گورمونى) مەن پايدالى اقۋىزدار ءبولىنىپ، جۇيكە جۇيەلەرى مەن ميعا تارايدى. سول ارقىلى ادام ويى ۇشقىر ءارى ەستە ساقتاۋ قابىلەتى جاقسارا ءتۇسىپ، كوڭىل- كۇيگە اسەر ەتەدى ەكەن. ادام جاتتىعۋدان كەيىن ءوزىن سەرگەك، جەڭىل ءارى باقىتتى سەزىنۋىنىڭ ءبىر سىرى دا وسى.
دەنە جاتتىعۋلارى ادامنىڭ كوڭىل- كۇيىن عانا كوتەرىپ قويمايدى، قاناينالىم جۇيەسىن جاقسارتادى. قان قىسىمى مەن جۇرەك- قان تامىرلارى اۋرۋلارىنىڭ الدىن الادى. سپورتپەن شۇعىلدانۋ ارقىلى ۇيقىنىڭ ۋاقىتى دا رەتتەلەدى. Clinical Sports Medicine جۋرنالى اقپاراتى بويىنشا، جاتتىعۋ جاساۋ - ميعا ۇيقىنى جەتكىزۋگە جول اشاتىن ءبىر ءتاسىل دە ەكەن. عالىمدار ا ق ش- تىڭ پەنسيلۆانيا ۋنيۆەرسيتەتىنىڭ 200 گە جۋىق ستۋدەنتىنە زەرتتەۋ جۇرگىزگەن. ولار كۇنىنە 20 مينۋتتان استام ۋاقىتىن ءتۇرلى دەنە جاتتىعۋلارىنا ارناعان. ال سەگىز كۇننەن كەيىن قاتىسۋشىلار وزدەرىنىڭ باسىنان وتكەرىپ جۇرگەن كۇيلەرىن جازىپ تاپسىرعان. ناتيجەسىندە كوبىسى ۇيقىسىزدىقتان، السىزدىكتەن قۇتىلعانىن مالىمدەگەن. سونىمەن قاتار، دارىگەرلەر قاتىسۋشىلاردىڭ پسيحيكاسىندا وڭ وزگەرىستەر بارىن انىقتاعان. ستۋدەنتتەر بولسا، جاتتىعۋ جۇمىستارىنان كەيىن كوڭىل- كۇيلەرىنىڭ كوتەرىلىپ، وزدەرىن باقىتتى سەزىنىپ جۇرگەندەرىن جەتكىزگەن.
سپورت زالدارىنا بارىپ جاتتىعۋ - ادامنىڭ وزىنە دەگەن باعاسىن وسىرەدى. ارتىق سالماقتان ارىلىپ، زالدىڭ اۋراسىن سەزىنۋدىڭ ءوزى ادامنىڭ مەرەيىن اسىرادى. مۇنىڭ ءوزى پسيحولوگيالىق تۇرعىدان ءوزىڭدى جاقسى كورۋگە، ءوز- وزىڭە كوڭىل بولۋگە زور سەپتىگىن تيگىزەدى. The British Journal of Sports Medicine جازعانداي، سپورت ادامنىڭ جۇمىس ونىمدىلىگىنە دە اسەرىن تيگىزەدى ەكەن. زەرتتەۋلەر بويىنشا سپورت زالعا بارىپ جاتتىعىپ جۇرگەن جانداردىڭ كرەاتيۆتى ويلاۋ كورسەتكىشتەرى ەداۋىر ارتقان. ءبىر سوزبەن ايتقاندا، فيزيكالىق جاتتىعۋلار - جەتىستىككە باستار بىردەن- ءبىر جول.
سەنت- لەو ۋنيۆەرسيتەتى عالىمدارى سپورتپەن شۇعىلداناتىن جاندار ءوز ۋاقىتىن ءتيىمدى پايدالانا الاتىنى جايلى ايتادى. ولار ءوز ىستەرىنە تياناقتى بولىپ، باستاعان ءىسىن اياقسىز قالدىرمايدى ەكەن. باستىسى وزدەرىن ءار ساتتە باقىتتى سەزىنىپ جۇرەدى ەكەن. سپورت - ادامنىڭ رۋحاني الەمى ءۇشىن دە ماڭىزدى. ويتكەنى، ءالسىز ءارى قيىندىققا كوپ رەتتە قارسى تۇرۋعا قاۋقارى جەتىسە بەرمەيتىن جاندارعا ماماندار ءبىر اۋىق سپورتپەن شۇعىلدانۋعا كەڭەس بەرەدى. كۇيزەلىسكە ۇشىراعان ساتتەردە دەنە جاتتىعۋلارىنا دەن قويساڭىز، جاڭا قۇلشىنىس پەن تىڭ سەرپىن ارقاسىندا ەرەكشە ءومىر سۇرۋگە ۇمتىلا تۇسەسىز. بۇل دا سپورتتىڭ، دەنە جاتتىعۋلارىنىڭ ءبىر قۇدىرەتى.
Massaget.kz