جامبىل وبلىسىندا «قايرىمدىلىق كەرۋەنى» بايقاۋى جاريالاندى

 استانا. قازاقپارات - جامبىل وبلىسىندا قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى، قازاقستاننىڭ ىسكەر ايەلدەر قاۋىمداستىعى جانە «حابار» اگەنتتىگىنىڭ بىرلەسكەن «قايىرىمدىلىق كەرۋەنى» رەسپۋبليكالىق بايقاۋى جالعاسۋدا.

جوبانىڭ ماقساتى - قايىرىمدىلىق يدەيالارىن دارىپتەۋ، بەلسەندى ازاماتتىق باستامالاردى دامىتۋ.

بايقاۋعا الەۋمەتتىك، قوعامدىق پروبلەمالاردى شەشۋگە جانە وزدەرىنىڭ جومارتتىعىمەن باسقالاردى مەيىرىمدىلىككە ىنتالاندىرۋعا ۇلەس قوسىپ جۇرگەن جەكە جانە زاڭدى تۇلعالار قاتىسا الادى.

2018 -جىلعى قاراشادان باستاپ 2019 -جىلعى اقپانعا دەيىنگى كەزەڭدە ەلىمىزدىڭ بارلىق وڭىرىندە كونكۋرسانتتاردى ىرىكتەۋ جۇمىسى جۇرگىزىلەدى. كونكۋرس جەڭىمپازدارىنىڭ ەسىمدەرى اقپاننىڭ سوڭىندا - العىس ايتۋ كۇنى مەرەكەسىنىڭ قارساڭىندا بەلگىلى بولادى.

لاۋرەاتتار بەس نوميناتسيا بويىنشا انىقتالادى:

- «اسار» (نوميناتسيا حالىقتىڭ سالت- داستۇرىمەن بايلانىستى قايىرىمدىلىق قىزمەت كورسەتەتىن ادامدارعا قولداۋ كورسەتۋگە باعىتتالعان) ؛

- «تۋعان جەر» (ءبىلىم بەرۋ، ەكولوگيا جانە كورىكتەندىرۋ سالاسىندا تۋعان ولكەگە كومەك كورسەتەتىن ادامدارعا بەرىلەدى) ؛

- «مەيىرىم جولىندا» (اتالىمعا ەرىكتى نەگىزدە جانە تەگىن كومەك كورسەتەتىن، يگى ىستەر اتقاراتىن ادامدار يە بولادى) ؛

- «باتىل جۇرەك» (نوميناتسيا ەرلىك ءىس جاساعان، جانكەشتىلىك تانىتقان ادامعا قولداۋ كورسەتۋ ماقساتىندا تاعايىندالادى) ؛

- «قايىرىمدىلىق تاريحى» (نوميناتسيا ب ا ق- تا قايىرىمدىلىق تاقىرىبىن قوزعايتىن، قوعامنىڭ نازارىن الەۋمەتتىك پروبلەمالارعا اۋدارتاتىن ماتەريالداردىڭ جاريالانۋىنىن قامتاماسىز ەتەتىن جۋرناليستەرگە نەمەسە شىعارماشىلىق ۇجىمعا بەرىلەدى) .

  كونكۋرسقا كاسىپكەرلىك سۋبەكتىلەرى جانە قايىرىمدىلىق قىزمەتتى مەملەكەتتىك قولداۋ ارقىلى جۇرگىزەتىن تۇلعالار (مەملەكەتتىك گرانت، مەملەكەتتىك تاپسىرىس جانە ت. ب. ) قاتىستىرىلمايدى.