ايكا فيلمى «وسكار» ۇمىتكەرلەرىنىڭ قاتارىنان شىعىپ قالدى
«ۇزدىك شەتەلدىك فيلم» نوميناتسياسىنداعى اقىرعى تىزىمگە بەس فيلم ەندى. ولار: مەكسيكالىق «روما» (رەجيسسەرى الفونسو كۋارون) ، پولشالىق «قىرعي- قاباق سوعىس» (پاۆەل پاۆليكوۆسكي) ، جاپونيالىق «دۇكەن ۇرىلارى» (حيروكادزۋ كورەەدا) ، ليۆاندىق «كاپەرناۋم» (نادين لاباكي) جانە گەرمانيالىق فلوريان حەنكەل فون دوننەرسمارك تۇسىرگەن «اۆتورلىعى جوق جۇمىس» فيلمدەرى.
جەڭىمپازدار 24 - اقپانىندا «وسكار» سىيلىعىن تابىستاۋدىڭ 91- راسىمىندە انىقتالادى. ۇزدىكتەردى ماراپاتتاۋ لوس- اندجەلەس قالاسىنىڭ Dolby تەاترىندا وتەدى.
بۇعان دەيىن «ايكا» فيلمىنىڭ «وسكار» كينوسىيلىعىنىڭ «شەتەل تىلىندەگى ۇزدىك فيلم» كاتەگورياسىنداعى توعىز كارتينادان تۇراتىن قىسقا تىزىمگە ەنگەنىن حابارلاعان ەدىك.
«ايكا» فيلمىنىڭ سيۋجەتى - قىرعىزستاننان ماسكەۋگە كەلىپ، وندا زاڭسىز جۇمىس ىستەپ جۇرگەن جاس ەميگرانت ايەلدىڭ وقيعاسى، ونىڭ ىشكى ادامي ءوسۋى، انالىق سەزىمى. باستى ءرولدى قازاقستاندىق اكتريسا سامال ەسلياموۆا سومداعان. ول 71- كانن كينوفەستيۆالىنىڭ ۇزدىك اكتريساسى دەپ تانىلدى.