قوعامدىق كولىكتە تەگىن ءجۇرۋدى قولعا العان ەل
بۇل تۋرالى ەلدەگى قوعاممەن جۇمىس ءمينيسترى فرانسۋا باۋش حابارلادى، - دەپ جازادى Deutsche Welle. قوعامدىق كولىكتى تەگىن ەتىپ ەل بيلىگى اۆتوكولىك كەپتەلىسى ماسەلەسىن شەشپەك. سەبەبى ليۋكسەمبۋرگ الەمدەگى ەڭ ۇلكەن كەپتەلىس ماسەلەسى بار ەلگە جاتادى. 2016 -جىلعى زەرتتەۋلەر قورىتىندىسى بويىنشا، ليۋكسەمبۋرگتىڭ استاناسىندا كەپتەلىس شامامەن 33 ساعاتقا سوزىلعان. بۇل وسى جەرگە كورشى ەلدەردەن جۇمىس ىزدەپ كەلەتىندەر سانىنىڭ ارتۋىمەن بايلانىستى. تۇراقتى 600 مىڭعا جۋىق ادام تۇرسا، فرانسيا، بەلگيا مەن گەرمانيادان جۇمىسقا كۇندەلىكتى 200 مىڭ ادام شەكارا ءوتىپ كەلەدى ەكەن.
ليۋكسەمبۋرگتە جۇمىسشىلارعا تولەنەتىن ەڭبەكاقى دا جوعارى. 2016 -جىلعى ستاتيستيكا بويىنشا ەڭ تومەنگى جالاقى 2190 دوللاردى قۇراعان. قوعامدىق كولىكتىڭ تەگىن بولۋى ءۇشىن ەل جىلىنا قوسىمشا 40 ميلليون ەۋرو شىعىندايدى. ايتكەنمەن ەل باسشىلىعى مۇنى ماڭىزى جوعارى جوبا دەپ باعالاپ وتىر. سەبەبى تەگىن ءجۇرۋدى قامتاماسىز ەتۋ ارقىلى كەپتەلىس ماسەلەسى عانا شەشىلىپ قويماي، ەكولوگيالىق تۇرعىدان دا ءتيىمدى بولماق.
ليۋكسەمبۋرگ ۇلى گەرتسوگتىگى - باتىس ەۋروپاداعى مەملەكەت. اكىمشىلىك جاعىنان 3 وكرۋگكە بولىنەدى. رەسمي تىلدەرى - فرانتسۋز، نەمىس، ليۋكسەمبۋرگ تىلدەرى. حالقىنىڭ كوپشىلىگى حريستيان - كاتوليكتەر. جوعارعى زاڭ شىعارۋشى ورگانى - پارلامەنت (دەپۋتاتتار پالاتاسى) . اقشا بىرلىگى - يەۆرو. ليۋكسەمبۋرگ - ونەركاسىبى دامىعان ەل. ەلەكترونيكا ءوندىرىسى، حيميا ونەركاسىبى، تسەمەنت، توقىما كاسىپورىندارى بار. ەكسپورتقا حيميا، مەتاللۋرگيا ونىمدەرىن، تاعامدار مەن كيىم- كەشەك شىعارادى، سىرتتان استىق، مەتالل، مۇناي، كومىر، ت. ب. اكەلەدى. مال، ەگىن، ءجۇزىم شارۋاشىلىعى دامىعان. جىل سايىن ەلگە كەلەتىن تۋريستەر سانى دا كوپ. وزگە دە قىزىقتى دەرەكتەر توپتاماسى جايلى ايتا وتىرايىق.
► ليۋكسەمبۋرگ - تەك قانا ەۋروپاداعى ەمەس، بۇكىل الەمدەگى ەڭ كىشكەنتاي مەملەكەتتەردىڭ ءبىرى. ونىڭ جەر كولەمى بار بولعانى 2600 شارشى شاقىرىم عانا.
► ەل اتاۋى نەمىس ءتىلى ديالەكتى بويىنشا پايدا بولعان. "Lucilinburch" دەگەندى اۋداراتىن بولساق، «شاعىن قالا» دەگەن ماعىنانى بىلدىرەدى.
► ليۋكسەمبۋرگتىڭ حالىق سانى - 576000 ادام عانا. ونىڭ كوپشىلىگى ەل استاناسى ليۋكسەمبۋرگتە تۇرادى.
► ەلدەگى ورتاشا ءومىر ءسۇرۋ ۇزاقتىعى ەركەكتەردە - 77.6 جىل، ال ايەلدەردە 82.7 جىل. بۇل - الەمدەگى ەڭ جوعارى كورسەتكىشتەردىڭ ءبىرى.
► ليۋكسەمبۋرگ ءالى كۇنگە دەيىن جان باسىنا شاققانداعى ج ءى ءو جونىنەن الەمدەگى ءبىرىنشى ورىنىن ساقتاپ كەلەدى. بۇل ەۋروپاداعى كورسەتكىشتەن 3 ەسە جوعارى!
► اۆتوكولىك جانە تەمىرجولدىڭ وتە تىعىز ورنالاسقانىنا قاراماستان، ليۋكسەمبۋرگتىڭ ۇشتەن ءبىر بولىگىن ورمان الىپ جاتىر. ەلدىڭ ساۋاتتىلىق دەڭگەيى %100 ، ءبىلىم بەرۋ ساپاسى الەمدەگى الدىڭعى ورىنداردىڭ بىرىندە.
► ماڭىزدى تاريحي كورىكتى جەرلەرىنىڭ وتە كوپ بولۋىنىڭ ارقاسىندا ەل استاناسى ليۋكسەمبۋرگ تۇگەلىمەن يۋنەسكو- نىڭ قورعاۋىنا الىنعان.
► ليۋكسەمبۋرگتە تاريحي قورعاندار ورنى كوپ. ءزاۋلىم سارايلار ساقتالىپ قالماسا دا، جەر استى جولدارى ءالى كۇنگە دەيىن بۇزىلماعان. ەلدەگى جارتاستاردان تەمىرمەن تۇمشالانعان تەرەزەلەردى ايقىن بايقاۋعا بولادى.
Massaget.kz