قاشاعان جىراۋدىڭ ايتقاندارى
وسىنى بىلەتىن كەدەي جىگىت قاشاعانعا كەلىپ:
- اقىن اعا، مەنىڭ جالعىز اتىمدى باي اۋىلىنىڭ ەسەر جىگىتتەرى تارتىپ الدى. شاعىنىپ ايماعانبەت بيگە بارايىن دەسەم، ول ءالى زورلىقشىلاردىڭ اعايىنى كوپ. وسىعان اقىل بەرىڭىزشى؟ - دەيدى. سوندا قاشاعان اقىن:
- شىراعىم، نىسپىڭ كىم؟ - دەپتى.
- شوڭقارا.
- ەندەشە، ءبيدىڭ الدىنا بار دا ارىزدىڭ سوڭىنان:
مەنىڭ اتىم شوڭقارا،
قىرىن كەلمەي، وڭ قارا.
تورەلىكتى ءتۇزۋ بەر،
تۋعانىڭا سوڭ قارا، - دەگەيسىڭ دەپتى. سوزدەن ۇتىلعان ايماعانبەت امالسىزدان دۇرىس تورەلىك بەرىپ، جىگىتتىڭ اتىن قايتارىپتى.
***
وكشەسى ويىلىپ، تابانى سويىلىپ، قوي ارتىندا ازاپ شەگىپ، ارىپ- اشىپ قويشى بالا - قاشاعان تاياعىن جەرگە شانشىپ، شاپانىن كۇركە ەتىپ جاتا قالسا، كوزى ءىلىنىپ كەتەدى. شوشىپ ويانىپ، اتىپ تۇرسا، قويى ۇزاپ كەتكەن. القىنا جۇگىرىپ، مال سوڭىنا جەتە بەرگەندە، جەل ايداعان ءبىر تۇيەقارىن قويدى دۇرلىكتىرە ۇركىتىپ، ۇزاتىپ الىپ كەتەدى. ىزىلانعان قاشاعان وسى جەردە ىلە- شالا تۇيەقارىنعا ولەڭ شىعارادى.
- اسسالاۋماعالايكۇم، تۇيەقارىن،
اداسقان اقىلىڭنان سەن ءبىر جارىم.
كەلدىڭ دە قيا شەتتەن قويدى ۇركىتتىڭ،
الدىڭدا بىلمەيسىڭ بە نەنىڭ بارىن!؟
تۇيەقارىن سوزىنە بىلايشا جاۋاپ قاتادى:
- ۋاعالايكۇماسسالام، تۇيەقارىن،
اداسقان اقىلىڭنان، - دەيسىڭ، - جارىم.
جول ءجۇرىپ الىس جولدان كەلە جاتساڭ
الدىندا بىلەر مە ەدىڭ نەنىڭ بارىن!؟
***
قاشاعان جىراۋدىڭ قويشىعا ايتقانى:
قوي ىشىندە شۇنىق قوي،
باۋىرى تولى بۇلاق قوي.
جازىعى قويشى دەمەسەڭ
قويدى ساۋىپ وتىرعان،
كەرە قارىس ماڭدايى قىزدار سۇيەر شىراق قوي، - دەپ قويشى جىگىتتى ازىلدەگەن ەكەن.
***
قاشاعان جىراۋ بازاردان ءماسى ساتىپ الىپ كيەدى دە، ءبىر بايدىڭ ۇيىنە كەلىپ قونادى. جالدامالى ەتىكشى مۇستاق قاشاعانعا:
- ءماسىڭىز وزىڭىزگە لايىقسىز ەكەن، - دەپ قويماپتى. سوندا قاشاعان بىلاي دەگەن ەكەن:
ءماسىمنىڭ باسى تارلاۋ، قونىشى قىسقا،
ساۋدالاپ الىپ ەدىم اسىعىستا.
بولعانمەن باسى تارلاۋ، قونىشى قىسقا،
سيپالاپ ۇلتان مەنەن باسىن ۇستا.
مۇستاق- اۋ، ءوزىڭ اقشاڭ تۇگەل بولسا
بىلشىلداماي، جاي وتىر ك.. . قىس تا.
اڭداماي سويلەگەن سازايىن وسىلايشا الىپتى.
Massaget.kz