كەلىن مەن توركىننىڭ قارىم-قاتىناسى

None
None
استانا. قازاقپارات - قازاق سالتىندا، ۇزاتىلعان قىز ءوزى كەلىن بولىپ تۇسكەن وتباسىنىڭ زاڭدى مۇشەسىنە اينالادى. ياعني، ۇزاتىلىپ بارعان ەر ازاماتىنىڭ زاڭدى جارى.

ونىڭ ەندىگى قۇقىعى مەن مۇددەسىن، ازاماتتىق ورنىن ءوزى كەلىن بولىپ بارعان وتباسى قورعايدى. ال ونىڭ توركىنى، ياعني، اتا -اناسى مەن باۋىرلارى ونىمەن تەك تۋىستىق قاتىناستا بولادى. ولار قىزى كەلىن بولىپ بارعان وتباسىنىڭ وتباسىلىق ىستەرىنە ورىنسىز ارالاسا المايدى.

اتا -انانىڭ ۇزاتىلعان قىزىنىڭ تۇرمىستىق جانە وتباسىلىق ىستەرىنە ورىنسىز ارالاسۋى كورگەنسىزدىك، تاربيەسىزدىك، ءتىپتى جولسىزدىق بولادى.

الايدا، قىزدارىنىڭ نامىسى تاپتالىپ، قورلانعان جاعدايدا قۇدالارى مەن كۇيەۋ بالالارىمەن بەيبىت تۇردە سويلەسۋ كەرەك.

ادەتتە، قىزدارى ۇزاتىلىپ بارعان جەردە كۇيەۋى نەمەسە اتا-ەنە، تۋىسقاندارىمەن رەنجىسىپ جاتسا، قىزدىڭ اتا-اناسى قىزدارىن: «كۋيەۋىڭ مەن اتا-ەنەڭنىڭ تىلەگىنەن شىعىپ، قاينىلارىڭنىڭ ءتىلىن تابا الماساڭ قايتىپ ادام بولاسىڭ، «تاس تۇسكەن جەرىنە اۋىر» دەگەن، سەن ءوزىڭ كەلىن بولىپ تۇسكەن ءۇيدىڭ زاڭدى ءبىر مۇشەسىسىڭ، جاقسى قىلىق، جاراسىمدى مىنەزىڭمەن بارعان جەرىڭنىڭ كوڭىلىنەن شىعۋ سەنىڭ كەلىندىك مىندەتىڭ» دەپ سابىرعا شاقىرعان ءجون. رەنجىپ، قايىن جۇرتىن جامانداپ كەلگەن ارۋ بولسا وعان باس كەزىنەن تيىم سالۋ كەرەك.

قازاق سالتىندا ۇزاتىلعان قىزدىڭ اكە ۇيىنە قاشىپ كەلۋى بەتكە سالىق، سۇيەككە تاڭبا تۇسىرەدى. وتە ۇياتتى ءىس سانالعان. «قايتا شاپقان جاۋ جامان، قايتىپ كەلگەن قىز جامان» دەپ قىزدارىنىڭ بارعان جەرىنەن قايتىپ كەلۋىن وتە جەك كورەتىندىكتەن، قازاق قىزدارى وزدەرى كەلىن بولىپ بارعان وتباسى مەن ەل-جۇرتىن «ءوز ەلىم، ءوز جۇرتىم دەپ» ءبىلىپ، سول ءوزى تۇسكەن وتباسى مەن ەل-جۇرتقا باۋىر باسىپ، سوندا ءتۇتىن تۇتەتىپ، جاقسى ءىس، جايدارى مىنەزىمەن قيىندىق اتاۋلىنى جەڭىپ، اتا-اناسى ەل-جۇرتىنىڭ بەتىنە شىركەۋ كەلتىرمەگەن.

قانداي جاعدايدا دا توركىنىنە قاشىپ-پىسپەگەن. قايتا اقىلدىلىعى مەن العىرلىعى، قايسارلىعى مەن ىسكەرلىگى ارقىلى بارعان جەرىندەگى ۇلكەن-كىشىمەن تۇگەل ءتىل تابىسىپ «تەكتى كەلىن، جاقسى كەلىن، ىسكەر كەلىن ىسمەر كەلىن، اقىلدى كەلىن، ءبىلىمدى كەلىن، ءبي كەلىن» اتانىپ، ەل جۇرتتىڭ سىي-قۇرمەتىنە بولەنىپ وتىرعان.

سوڭعى جاڭالىقتار