بەس مەملەكەت كاسپي قۇقىقتىق مارتەبەسى اياسىندا راسىمدەردى ورىنداپ جاتىر

استانا. قازاقپارات - بۇگىن پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ تۋرالى» زاڭ جوباسى تالقىلاندى، دەپ حابارلايدى قازاقپارات.

«كونۆەنتسياعا 2018-جىلعى 12- تامىزدا اقتاۋ قالاسىندا قازاقستان، ازەربايجان، يران، رەسەي جانە تۇرىكمەنستان پرەزيدەنتتەرى قول قويدى. بۇل قۇجاتتىڭ قول قويىلۋىنا 25 جىلعا سوزىلعان كەلىسسوزدەر سەبەپشى بولدى. ق ر پرەزيدەنتى نۇرسۇلتان نازاربايەۆ اقتاۋ سامميتىندە ءسوز سويلەۋ كەزىندە كونۆەنتسيانى كاسپي تەڭىزىنىڭ كونستيتۋتسياسى دەپ اتاپ، بۇل قۇجات وڭىردەگى قاۋىپسىزدىك، تۇراقتىلىق پەن وركەندەۋدىڭ كەپىلى دەپ مالىمدەدى»، - دەپ توقتالدى ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى.

كاسپي تەڭىزىنىڭ قۇقىقتىق مارتەبەسى بويىنشا ماسەلەلەر تاراپتاردىڭ ايرىقشا قۇزىرەتىنە جاتادى. مەملەكەتتەردىڭ ەگەمەندىگىن، اۋماقتىق تۇتاستىعىن، تاۋەلسىزدىگىن، ەگەمەندىك تەڭدىگىن قۇرمەتتەۋ، كۇش نەمەسە كۇشپەن قورقىتۋدى قولدانباۋ، ءوزارا قۇرمەت، ىنتىماقتاستىق، ءبىر-ءبىرىنىڭ ىشكى ىستەرىنە ارالاسپاۋ سەكىلدى قاعيدالار نەگىزىندە جۇزەگە اسىرالاتىن بولادى. كاسپي تەڭىزىنىڭ اكۆاتورياسى ءارتۇرلى قۇقىقتىق رەجىمدەردە بولاتىن ىشكى سۋلار، اۋماقتىق سۋلار، بالىق اۋلاۋ ايماقتارى جانە ورتاق سۋ كەڭىستىگى بەلگىلەندى. اۋماقتىق سۋلار ەنى 15 تەڭىز ميلىنەن اسپايدى. ال ولاردىڭ سىرتقى سۋلارى تەڭىزدەگى مەملەكەتتىك شەكارالار بولىپ بەكىتىلدى.

ونىڭ ايتۋىنشا، كاسپي تەڭىزىنىڭ ءتۇبى مەن قويناۋىن سەكتورلارعا ءبولۋ جالپى مويىندالعان قاعيدالار مەن حالىقارالىق قۇقىقتىق نورمالاردى نازارعا الا وتىرىپ، شەكارالاس جانە قاراما-قارسى ورنالاسقان مەملەكەتتەردىڭ ۋاعدالاستىقتارى بويىنشا، ياعني مۇددەلى مەملەكەتتەردىڭ اراسىنداعى جەكە كەلىسىمدەر نەگىزىندە جۇزەگە اسىرىلادى.

«بىزدەگى اقپاراتقا سايكەس كاسپي جاعالاۋىنداعى بارلىق مەملەكەتتەر كونۆەنتسيانى راتيفيكاتسيالاۋ ءۇشىن قاجەتتى ىشكى راسىمدەردى ورىنداۋعا كىرىسىپ كەتتى. وتكەن جىلدىڭ 14- جەلتوقسانىندا تۇرىكمەنستان جاعى ونى راتيفيكاتسيالاۋ پروتسەسىن اياقتاعانىن حابارلادى»، - دەدى م. تىلەۋبەردى.

ءوز كەزەگىندە حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا كونۆەنتسياعا قول قويىلۋ وقيعاسى ۇلكەن جەتىستىك ەكەنىن اتاپ ءوتتى.

«اقتاۋدا تاريحي قۇجاتقا قول قويىلعانىن بىلەسىزدەر. كوپ جىلدار بويعى جۇرگىزىلگەن كەلىسسوزدەر ناتيجەسىندە ءتيىستى جەتىستىككە قول جەتكىزدىك. سوندىقتان كونۆەنتسياعا قول قويىلۋ وقيعاسى تەك ءبىزدىڭ عانا ەمەس، سونىمەن قاتار بارلىق كاسپي ماڭى ەلدەرىنىڭ جەڭىسى»، - دەدى د. نازاربايەۆا.

تالقىلاۋدان كەيىن كوميتەت مۇشەلەرى زاڭ جوباسىنا قولداۋ ءبىلدىرىپ، سەناتتىڭ جالپى وتىرىسىنا شىعارۋ تۋرالى شەشىم قابىلدادى.

ەستەرىڭىزگە سالا كەتەيىك، 2018-جىلدىڭ تامىزىندا كاسپي ماڭى مەملەكەتتەرىنىڭ بەسىنشى سامميتىندە بەس ەلدىڭ باسشىسى كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويدى.