ۇلتتىق كومپانيالاردىڭ قارجىسى رەسەي مەن قىتايعا قۇيىلماي، وتاندىق كاسىپكەرلەرگە بۇيىرادى

استانا. قازاقپارات - «سامۇرىق- قازىنا» اق off-take كەلىسىمشارتتارى بويىنشا ەكى جوبانى ىسكە قوستى، دەپ حابارلايدى قازاقپارات ءتىلشىسى.

قوردىڭ وپەراتسيالىق قىزمەت جونىندەگى باسقارۋشى ديرەكتورى الىشەر پىرمەتوۆتىڭ ايتۋىنشا، وتكەن جىلى العاش رەت off-take كەلىسىمشارتتارى ەنگىزىلدى. وعان سايكەس، كاسىپكەر ءوز جەرىمىزدە تاۋار شىعارسا، «سامۇرىق- قازىنا» قورى ونىمەن ۇزاق مەرزىمدى كەلىسىمشارتقا وتىرادى.

«وسىلايشا، ءبىز قازاقستاندا شىعارىلعان ونىمدەردى مىندەتتى تۇردە ساتىپ الامىز دەگەن مىندەتتەمەنى ءوز موينىمىزعا الامىز. ماسەلەن، وتكەن جىلى وسى ۇلگىدە ەكى جوبا ىسكە قوسىلدى.

ءبىرىنشىسى، ول - off-take كومپانياسىنىڭ جوعارى قۋاتتى تراسفورماتورلار ءوندىرىسى. اتالعان كاسىپورىن جەلتوقسان ايىندا ىسكە قوسىلىپ، بىزبەن تىكەلەي كەلىسىمشارت جاسادى. كەلىسىمنىڭ جالپى سوماسى 4 ميلليارد تەڭگە. ەكىنشىسى - «قازمۇنايگاز» كومپانياسىنا تيەسىلى قىسىمدى ولشەۋ قۇرالدارىنىڭ ءوندىرىسى. بۇل جوبالار بىزگە نە بەرەدى؟ بىرىنشىدەن، بۇگىنگە دەيىن وسى تاۋارلار قازاقستاندا شىعارىلماعاندىقتان، كومپانيالاردىڭ قارجىسى سىرت جاققا، نەگىزىنەن، رەسەي جانە قىتايعا كەتسە، جاڭاعى كاسىپورىنداردى ىسكە قوسقاننان كەيىن ول قارجى سىرتقا كەتپەيدى، وزىمىزدە قالادى. وسى شارالاردىڭ ناتيجەسىندە ءوز جەرىمىزدە قاجەتتى وندىرىستەر اشىلىپ وتىر. جاڭا جۇمىس ورىندارى قۇرىلدى. وعان قوسا، جاڭا وندىرىستەر بيۋدجەتكە قوسىمشا سالىق تولەيدى. جالپى، وسى ەكى- ءۇش جىلدىڭ ىشىندە ءبىز بۇرىن سوڭدى بولماعان وندىرىستەردى اشۋ ءۇشىن 10 كەلىسىمدى راسىمدەۋدى كوزدەيمىز»، - دەدى ءا. پىرمەتوۆ استانادا وتكەن باسپا ءسوز ءماسليحاتىندا.

 باسقارۋشى ديرەكتورى «سامۇرىق- قازىنا» قورى اياسىندا ساتىپ الۋلاردى وزگەرتۋ ماسەلەسىنە دە توقتالدى. ونىڭ سوزىنە قاراعاندا، بۇرىن 4500 تاۋارلار مەن قىزمەتتەر بويىنشا بارلىق ساتىپ الۋلار حولدينگتىڭ ءوز ىشىندە جۇرگىزىلدى. «وتكەن جىلى اتالعان كورسكەتكىش ون ەسەگە ازايدى. حولدينگتىڭ وزىندە 409 تاۋارلار مەن قىزمەتتەر قالدى. قالعانى شاعىن جانە ورتا بيزنەسكە بەرىلدى. وسىلايشا، كاسىپكەرلەر 309 ميلليارد تەڭگەنىڭ تاپسىرىستارىن الدى»، - دەپ اتاپ كورسەتتى ءا. پىرمەتوۆ.

 ايتا كەتەيىك، احمەتجان ەسىموۆ «سامۇرىق- قازىنانىڭ» تابىسىن جاريالادى. قوردىڭ نەگىزگى قىزمەتىنەن تۇسەتىن تابىس 31 پروتسەنتكە ءوستى. ال دەبيتورلىق قارىزدىڭ كولەمى 80 پروتسەنتكە ازايدى. بۇدان بولەك، قور باسشىسى وتكەن جىلدىڭ باستى جەتىستىكتەرىن اتادى.

اۆتور: ارمان اسقاروۆ