فيلوسوفيا دوكتورى دارەجەلەرىن الۋ ءۇشىن شەتەلدىك باسىلىمداردا جاريالانۋ تالابى
بۇل تۋرالى ءماجىلىس دەپۋتاتتارىنىڭ رەسمي ساۋالىنا وراي ق ر پرەمەر- ءمينيسترى باقىتجان ساعىنتايەۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«قازاقستاندىق فيلوسوفيا (PhD) دوكتورى ديپلومدارىنىڭ حالىقارالىق ءبىلىم بەرۋ كەڭىستىگىندە سالىستىرىمدىلىعى دوكتورانتتار دايارلاۋدىڭ جانە قورعالاتىن ديسسەرتاتسيالار دەڭگەيىنىڭ جوعارى ساپاسىن كوزدەيدى. بۇل 2011 -جىلى دوكتورانتۋرانىڭ جاڭا مودەلىن ەنگىزۋ كەزىندە Clarivate Analytics دەرەكتەر بازاسىندا يمپاكت- فاكتورى بار نەمەسە Scopus بازاسىنا كىرەتىن شەتەلدىك باسىلىمداردا جاريالانىم بولۋ تالابىنىڭ ماقساتقا ساي ەكەندىگىن ايقىنداپ بەردى. ق ر ءبىلىم جانە عىلىم ءمينيسترىنىڭ 2011 -جىلعى 31 - ناۋرىزداعى № 127 بۇيرىعىمەن بەكىتىلگەن دارەجەلەر بەرۋ قاعيدالارىنا سايكەس دوكتورانتتىڭ جەتى جاريالانىمىنىڭ بىرەۋى حالىقارالىق رەتسەنزيالاناتىن باسىلىمدا جاريالانۋى قاجەت»، - دەدى باقىتجان ساعىنتايەۆ.
بۇل رەتتە، ۇكىمەت باسشىسىنىڭ اتاپ وتۋىنشە، تەحنيكالىق باعىتتارمەن سالىستىرعاندا دوكتورانتۋرانىڭ گۋمانيتارلىق دايارلىق باعىتتارى ءۇشىن تاڭداۋ كوبىرەك - شەتەلدىك جۋرنال Clarivate Analytics اقپاراتتىق كومپانياسىنىڭ دەرەكتەر بازاسىندا (Web of Science Core Collection) نولدىك ەمەس يمپاكت- فاكتورعا يە نەمەسە يندەكساتسيالاناتىن بولۋى كەرەك نەمەسە Scopus, JSTOR بازالارىنا كىرۋى قاجەت.
«2017 -جىلعى 581 تۇلەكتىڭ ىشىنەن 406 دوكتورانت نەمەسە شامامەن 70 پايىز ديسسەرتاتسيالارىن قورعادى. ولاردىڭ بارلىعى ديسسەرتاتسيالارىن قورعاعانعا دەيىن شەتەلدىك ماقالالار جاريالاعان. ۋاقىتىندا قورعالمايتىن دوكتورلىق ديسسەرتاتسيالار پروبلەماسى ج و و- دا دوكتورانتتاردى دايارلاۋ ساپاسى مەن باقىلاۋ ماسەلەسىنە جاتادى. Clarivate Analytics جانە Scopus بازاسىنا كىرەتىن شەتەلدىك باسىلىمداردىڭ نەگىزگى ولشەمشارتتارى - ماقالانىڭ ساپاسى مەن ونىڭ بىرەگەيلىگى، حالىقارالىق نەمەسە جاھاندىق كوزقاراس، قورىتىندىلاردىڭ شىنايىلىعى مەن وبەكتيۆتىلىگى، لوگيكالىق مازمۇندالعان دالەلدەمەسى. سونىمەن قاتار، بازالاردا يندەكساتسيالانۋ ءۇشىن جۋرنالدار جاريالانىمداردىڭ حالىقارالىق سيپاتىن جانە اۆتورلاردىڭ كەڭ گەوگرافياسىن كورسەتۋى ءتيىس. شەتەلدىك رەيتينگتىك باسىلىمداردا جاريالانۋ مۇمكىندىگى دوكتورانتتاردى دايارلاۋ باعىتىنا تاۋەلدى ەمەس»، - دەپ اتاپ وتەدى ۇكىمەت باسشىسى.
ونىڭ دەرەگىنشە، سوڭعى 3 جىلدا جالپى قورعاۋلار ىشىندە گۋمانيتارلىق بەيىندەگى دوكتورانتتار سانى 29 پايىزدى قۇرايدى جانە ولاردىڭ بارىندە تالاپ ەتىلەتىن شەتەلدىك جاريالانىم بار. بۇل رەتتە، دوكتورانتۋرانىڭ ءبىلىم بەرۋ باعدارلاماسى رەيتينگتىك شەتەلدىك باسىلىمداردا ديسسەرتاتسيالار ناتيجەلەرىن جاريالاۋ ءۇشىن جەتكىلىكتى مۇمكىندىكتەر جاسايدى. ايتالىق، دوكتورانتۋرا بويىنشا مەملەكەتتىك جالپىعا مىندەتتى ءبىلىم بەرۋ ستاندارتىنا سايكەس دوكتورلىق ديسسەرتاتسيا جونىندەگى عىلىمي كونسۋلتانتتاردىڭ ءبىرى بولىپ شەتەلدىك عالىم تاعايىندالادى. سونداي- اق دايارلىق باعىتىنا قاراماستان بارلىق دوكتورانتتار شەتەلدە عىلىمي تاعىلىمدامادان وتۋگە ءتيىس.
Clarivate Analytics جانە Scopus دەرەكتەر بازاسىنداعى گۋمانيتارلىق باعىتتار بويىنشا رەيتينگتىك جۋرنالداردىڭ سانى دوكتورانتتاردىڭ زەرتتەۋلەرىنە سايكەس كەلەتىن جۋرنالدى تابۋعا جەتكىلىكتى. Clarivate Analytics دەرەكتەر بازاسىندا يمپاكت- فاكتورى بار جۋرنالداردىڭ 22 پايىزى (1700) الەۋمەتتىك عىلىمدارعا جاتقىزىلعان. Scopus بازاسىندا الەۋمەتتىك (گۋمانيتارلىق) عىلىمدار جانە ءومىر تۋرالى عىلىمدار بويىنشا باسىلىمدار تيىسىنشە 24 پەن 15 پايىزدى قۇرايدى.
«سونىمەن بىرگە، دوكتورانتتار مەن عىلىمي اتاقتارعا ۇمىتكەرلەردىڭ عىلىمي قىزمەتىنىڭ ناتيجەلەرىن جاريالاۋعا ساپاسى جوعارىلاۋ رەيتينگتىك جۋرنالداردى ىرىكتەۋ ءۇشىن قازاقستان رەسپۋبليكاسى پرەزيدەنتى اكىمشىلىگىنىڭ تاپسىرماسىنا سايكەس دارەجەلەر بەرۋ قاعيدالارىنا جانە عىلىمي اتاقتار (قاۋىمداستىرىلعان پروفەسسور (دوتسەنت) ، پروفەسسور) بەرۋ ەرەجەسىنە بيبليومەتريالىق كورسەتكىشتەردى (Clarivate Analytics كومپانياسىنىڭ Journal Citation Reports دەرەگى بويىنشا كۆارتيل جانە Scopus بازاسى بويىنشا CiteScore پروتسەنتيل كورسەتكىشى) پايدالانۋدى كوزدەيتىن وزگەرىستەر ەنگىزىلۋدە. وسىلايشا، فيلوسوفيا (PhD) دوكتورى، بەيىنى بويىنشا دوكتور دارەجەلەرىنە ۇمىتكەرلەر ءۇشىن حالىقارالىق رەيتينگتىك باسىلىمداردا جاريالانۋ تالابى جاس عالىمداردىڭ اكادەميالىق جازۋ دەڭگەيىن جوعارىلاتۋعا، سونداي- اق ۇلتتىق گۋمانيتارلىق عىلىمدى حالىقارالىق عىلىمي كەڭىستىكتە بىرەگەي الەۋمەتتىك ءبىلىم رەتىندە تانىمال ەتۋگە باعىتتالعان»، - دەدى پرەمەر- مينيستر.
اۆتور: مارلان جيەمباي