جەمقورلىق داۋى: ق ر ب ع م مەملەكەتتىك قىزمەت ىستەرى اگەنتتىگىنە جاۋاپ بەردى

استانا. قازاقپارات - ق ر ءبىلىم جانە عىلىم مينيسترلىگى مەملەكەتتەن قارجىلاندىرىلاتىن عىلىمي جوبالاردى ىرىكتەيتىن ۇلتتىق عىلىمي كەڭەس قۇرامىنا بىرنەشە مەمورگاندى قوسۋدى ۇسىندى، دەپ حابارلايدى قازاقپارات.

اتاپ ايتقاندا، عىلىمي جوبالاردى قارجىلاندىرۋ جۇيەسىنىڭ اشىقتىعىن قامتاماسىز ەتۋ ءۇشىن ۇلتتىق عىلىمي كەڭەسكە قر مەملەكەتتىك قىزمەت ىستەرى اگەنتتىگىنىڭ، پروكۋراتۋرا ورگاندارىنىڭ، ەسەپ كوميتەتىنىڭ وكىلدەرىن ەنگىزۋ ۇسىنىلدى.

«مينيسترلىك عىلىم سالاسىن گرانتتىق قارجىلاندىرۋ جۇيەسىنە نورماتيۆتىك جانە زاڭنامالىق وزگەرىستەر ەنگىزۋ قاجەتتىگىمەن كەلىسەدى. اتالعان جۇمىستىڭ جاڭا باعىتتارىن وتكەن جىلى عىلىمي قاۋىمداستىق كەڭىنەن تالقىلاپ، قولداۋ بىلدىرگەن ەدى. مينيسترلىك ق ر پرەزيدەنتى اكىمشىلىگى، ەسەپ كوميتەتى، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنەن كەلىپ تۇسكەن ۇسىنىمداردى جيناقتادى. قازىرگى ۋاقىتتا نورماتيۆتىك قۇقىقتىق اكتىلەرگە سايكەس وزگەرىستەر مەن تولىقتىرۋلار ازىرلەنىپ جاتىر»، - دەلىنگەن ق ر ءبىلىم جانە عىلىم ءمينيسترلىنىڭ باسپا ءسوز قىزمەتى جىبەرگەن حابارلامادا.

سونىمەن بىرگە، عىلىم كوميتەتى قارجىلاندىرىلاتىن جوبالار بويىنشا ۇلتتىق عىلىمي كەڭەس عالىمدارى كۇماندى شەشىمدەر قابىلدايتىندىعى تۋرالى پىكىرمەن كەلىسپەيدى.

«عىلىمي جوبالاردى قارجىلاندىرۋ كونكۋرسىنا قاتىسۋشىلار تاراپىنان مۇددەلەر قايشىلىعىن بولدىرماۋ ماقساتىندا، ادىلدىك پەن تاۋەلسىزدىكتى قامتاماسىز ەتۋ ءۇشىن عىلىم كوميتەتىنىڭ ءتوراعاسى مىندەتىن اتقارۋشى راحىمجان نۇرسەيىتوۆ ۇلتتىق عىلىمي كەڭەس قۇرامىنا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى وكىلدەرىن جانە قاجەت بولسا، ق ر پروكۋراتۋرا ورگاندارى مەن ەسەپ كوميتەتىن قوسۋدى ۇسىندى. عىلىم كوميتەتى شەشىمدەرىنە نە مينيسترلىك، نە عىلىم كوميتەتى اسەر ەتە المايتىن ۇعك عالىمدارىنىڭ قارجىلاندىرىلاتىن جوبالار بويىنشا كۇماندى شەشىم قابىلدادى دەپ سانامايدى»، - دەلىنگەن حابارلامادا.

عىلىم كوميتەتى بارلىق عالىمدارعا ءوز جوباسى بويىنشا عىلىمي جۇمىس ناتيجەلەرىن تۇراقتى تۇردە قوعامعا حابارلاپ وتىرۋدى ۇسىندى.

ايتا كەتەيىك، وتكەن اپتادا ق ر مەملەكەتتىك قىزمەت ىستەرى اگەنتتىگى سىبايلاس جەمقورلىققا قارسى ساياسات دەپارتامەنتىنىڭ ديرەكتورى دانيار سابىربايەۆ ۇلتتىق عىلىمي كەڭەستى جەمقورلىققا جول بەردى دەپ سىناعان بولاتىن. ونىڭ ايتۋىنشا، ۇلتتىق عىلىمي كەڭەستەردىڭ قۇرامىن جاساقتاۋدا زاڭ ورەسكەل بۇزىلعان.

اۆتور: ايجان سەرىكجان قىزى