ترانسۇلتتىق قىلمىستىق توپتار قازاقستاندا قۇمار ويىنداردان ميللياردتاپ تابىس تاپقان
بۇل تۋرالى ق ر ىشكى ىستەر مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
«وتكەن جىلى پوليتسيانىڭ اۋماقتىق دەپارتامەنتتەرىنە جانە ءى ءى م- گە ازاماتتاردان رۇقسات ەتىلگەن بينگو- كلۋبتاردا قۇمار ويىنداردىڭ (ونلاين كازينو، ەلەكتروندى رۋلەتكا، پوكەر جانە ت. ب.) وينالاتىنى تۋرالى 70 ارىز كەلىپ ءتۇستى»، - دەلىنگەن مينيسترلىك حابارلاماسىندا.
ءمالىم ەتىلگەندەي، بىلتىر ەلىمىزدىڭ 17 قالاسىندا ورنالاسقان زاڭسىز قۇمار ويىن مەكەمەلەرىنە باقىلاۋ جۇرگىزىپ كەلگەن بىرنەشە ترانسۇلتتىق ۇيىمداسقان قىلمىستىق توپ قۇرىقتالدى.
«2018 -جىلى ءى ءى م- ءنىڭ ارنايى توبى باس پروكۋراتۋرانىڭ كومەگىمەن رەسپۋبليكا بويىنشا 5 اۋقىمدى شۇعىل- تەرگەۋ شارالارىن وتكىزدى. ناتيجەسىندە 17 قالادا 48 زاڭسىز قۇمار ويىن مەكەمەسىن ءوز باقىلاۋلارىندا ۇستاپ كەلگەن 4 ترانسۇلتتىق ۇيىمداسقان قىلمىستىق توپ ۇستالدى («بينگو بۋم» ، «ميستەر بينگو» ، «زودياك» ، «يمپەريال» ، «رويال ۆيپ» ). ءىس ماتەريالدارى سوتقا بەرىلدى جانە وسى ۋاقىتتا ءىس استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالۋدا. قىلمىستىق توپتىڭ ۇيىمداستىرۋشىلارى جانە باسشىلارى ا ق ش، يسپانيا، نەپال، بولگاريا، رەسەي جانە قىرعىزستان ازاماتتارى بولىپ تابىلادى. بارلىق شەتەلدىك ازاماتتىڭ تۇلعاسى انىقتالدى. ولاردىڭ ەكەۋى ۇستالدى، التاۋى حالىقارالىق ىزدەۋگە جاريالاندى»، - دەپ اتاپ ءوتتى مينيسترلىكتەن.
ءىس بويىنشا كۇدىكتى رەتىندە 40-تان استام ادام وتۋدە. ونىڭ 9-ىنا قاتىستى «قاماۋعا الۋ» تۇرىندەگى بۇلتارتپاۋ شاراسى قابىلداندى.
«2012 -جىلدان باستاپ تەك «يمپەريال» كلۋب جەلىسىنىڭ كىرىسى 7,5 ميلليارد تەڭگەدەن استام سوماعا جەتسە، «ميستەر بينگو» جەلىسى - 3,5 ميلليارد تەڭگە، «زودياك» جەلىسى 1,1 ميلليارد تەڭگە كىرىس تاپقان. قۇمار ويىندار مەكەمەلەرىنىڭ قىلمىستىق ارەكەتىنەن تۇسكەن تابىس تۇگەلدەي دەرلىك جولعا قويىلعان ارنالار بويىنشا شەت مەملەكەتتەرگە اۋدارىلىپ وتىرعان»، - دەلىنگەن باسپا ءسوز حابارلاماسىندا.
پوليتسيانىڭ حابارلاۋىنشا، رۇقسات ەتىلگەن بينگو- كلۋبتار رەتىندە تىركەلىپ، قۇمار ويىن وينالاتىن بۇل مەكەمەلەردە ادامدار ءىرى اقشالارىنان ايىرىلىپ جاتادى. ءتىپتى، ويىنشىلار اقشانى قارىزعا نەمەسە نەسيە تۇرىندە الىپ، اقشالاي قۇلدىققا ودان ارى ماتالا بەرەدى ەكەن.
«كەيدە اقشاسىنان ايىرىلىپ قالعانداردىڭ قىلمىسقا بارىپ جاتاتىنى دا بەلگىلى. ماسەلەن، سوڭعى 2 جىلدا استانا قالاسىندا عانا ويىن ورىندارىنان تۇراقتى تۇردە شىقپايتىن كليەنتتەر 14 ويىن ورنىندا 27 قىلمىس (1 كىسى ءولتىرۋ جاعدايى، 22 ۇرلىق، 2 توناۋ، 2 قاراقشىلىق) جاساعان»، - دەدى ۆەدومستۆودان.
اۆتور: ايان بەكەن ۇلى