س ءى م :«جۋسان» وپەراتسياسى جالعاسادى

 استانا. قازاقپارات - ق ر س ءى م رەسمي وكىلى ايبەك سمادياروۆ قازاقستان ازاماتتارىن سيريادان ەۆاكۋاتسيالاۋعا بايلانىستى گۋمانيتارلىق وپەراتسيا جالعاساتىنىن ايتتى، دەپ حابارلايدى قازاقپارات ءتىلشىسى.

«وزدەرىڭىزگە ءمالىم، وسى جىلدىڭ ەڭ باستى جاڭالىعى - مەملەكەت باسشىسىنىڭ تاپسىرماسىمەن ىسكە اسىرىلعان «جۋسان» وپەراتسياسى بولدى. ول وپەراتسيانىڭ ءمان- جايى سىرتقى ىستەر مينيسترلىگىنىڭ ارنايى بريفينگىندە ايتىلدى. وپەراتسيا شەڭبەرىندە 47 ازامات قازاقستانعا جەتكىزىلدى. ونىڭ وتىزى 1-5 جاس ارالىعىنداعى سابيلەر» ، - دەدى ايبەك سمادياروۆ.

ونىڭ ايتۋىنشا، ەلگە اكەلىنگەن سابيلەردىڭ كوپشىلىگى سيريا اۋماعىندا دۇنيەگە كەلگەن. سوندىقتان، بۇل وپەراتسيانىڭ باسى عانا، ول جالعاسىپ جاتىر.

«بۇل وپەراتسيا ءالى جالعاسادى. ءبىراق، ءمان- جايىن تولىق ايتا المايمىز. ويتكەنى، بۇل وپەراتسيادا بىزگە حالىقارالىق ۇيىمدار مەن سەرىكتەستەر كومەكتەسىپ جاتىر. سول سەبەپتى، كوپ اقپارات ءالى جۇمىس بابىندا. تۇسىنۋشىلىك تانىتۋدى سۇرايمىز» ، - دەدى ول.

ەسكە سالا كەتسەك، قازاقستان پرەزيدەنتى نۇرسۇلتان نازاربايەۆ قازاقستان ازاماتتارىن سيريادان ەۆاكۋاتسيالاۋعا بايلانىستى مالىمدەمە جاساعان بولاتىن. مەملەكەت باسشىسى ءوز سوزىندە اتاپ وتكەندەي، 6 - قاڭتاردا قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلعان.