قازاقستاندىق بوكسشى قىز حالىقارالىق تۋرنيردە توپ جاردى

كوكشەتاۋ. قازاقپارات - اقمولالىق بىلعارى قولعاپ شەبەرى دينا جولامان سەربيادا وتكەن حالىقارالىق تۋرنيردە توپ جاردى، دەپ حابارلايدى قازاقپارات ءتىلشىسى.

اقمولا وبلىسىنىڭ دەنە شىنىقتىرۋ جانە سپورت باسقارماسى حابارلاعانداي، جارىسقا 20 ەلدەن 144 سپورتشى قاتىسقان.

 قازاقستان قۇراماسى ساپىندا ەرەسەكتەر مەن جاستار جانە جاسوسپىرىمدەر قاتىستى. ونىڭ ىشىندە اقمولالىق بوكسشى قىزدار دينا جولامان مەن ءمولدىر بازاربايەۆا جاقسى ونەر كورسەتتى.

«54 كەلى سالماقتاعىلار اراسىندا دينا فرانتسۋزدىق سينتيي لوۆەرجوندى تورەشىلەردىڭ ءبىراۋىزدان شىعارعان شەشىمىمەن جەڭىپ، تۋرنير چەمپيونى اتاندى. ال 81 كەلى سالماقتاعىلار اراسىندا سىنعا تۇسكەن ءمولدىر بازاربايەۆا قولا جۇلدەگە يە بولدى» ، - دەيدى اقمولا وبلىسىنىڭ دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ حاتشىسى ماحاببات بولشينا.

ۆەدومستۆو كەلتىرگەن مالىمەتتەرگە قاراعاندا، قازاقستاننىڭ ايەلدەر قۇراماسى قورجىنعا 11 مەدال (5 التىن، 1 كۇمىس جانە 5 قولا) سالىپ، جالپى كوماندالىق ەسەپتە ءبىرىنشى ورىن يەلەندى. ال، ەكىنشى جانە ءۇشىنشى ورىنداردى رەسەي جانە سەربيا قۇرامالارى ءوزارا ءبولىستى.

وسىعان دەيىن، جاستار مەن جاسوسپىرىمدەردىڭ اراسىندا قىزدار كوماندالارى جالپى كوماندالىق ەسەپتە ءبىرىنشى ورىن الىپ، ءتۋرنيردىڭ سۋپەر كۋبوگىنىڭ يەگەرى اتاندى.