قازاقستاننىڭ ەكى فيلمى ۇزدىك اتاندى

  استانا. قازاقپارات - ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» كينوستۋدياسى «اديگۋل پروداكشنمەن» بىرلەسە تۇسىرگەن «ءبىزدىڭ قالانىڭ حانزاداسى» فيلمى «بادال راحمان اتىنداعى ۇزدىك بالالار فيلمى» پريزىن جەڭىپ الدى.

 فەستيۆال 2019 -جىلعى قاڭتاردىڭ 9 - مەن 18-  ارالىعىندا داككا(بانگلادەش) قالاسىندا وتكەن.

 

 «ادامدار اراسىنداعى بولتىرىك» ، «قىزعىش قۇس» ، «ماحاببات ستانتسياسى» اتتى فيلمدەرىمەن حالىققا تانىلعان تالعات تەمەنوۆتىڭ بۇل تۋىندىسى -  بالالار ءۇيىنىڭ تاربيەلەنۋشىسى جانە قارتتار ۇيىندە ءومىر سۇرەتىن قاريا تۋرالى.

 

 - مەن ءۇشىن بۇل كۇتپەگەن جاڭالىق بولدى. مەنىڭ دوسىم، تانىمال سەربيالىق ونەرتانۋشى، اتالعان كينوفەستيۆالدە بولعان ەكەن. سول كىسى قوڭىراۋ شالىپ، ءبىزدىڭ ءفيلمنىڭ ۇزدىك بالالار فيلمى اتالعانى تۋرالى ايتتى. بۇل جەڭىسىمىزگە وتە قۋانىشتىمىن. بۇل -  «كىشكەنتاي حانزادانىڭ» ۇلكەن جەڭىسى» ، - دەدى كارتينا رەجيسسەرى.

 

 ەستەرىڭىزگە سالا كەتەيىك، فيلمدە باستى ءرولدى سومداعان اكتەر تولەۋبەك ارالباي 2018 -جىلى شانحاي ىنتىماقتاستىق ۇيىمىنا مۇشە ەلدەر اراسىندا وتكىزىلگەن كينوفەستيۆالدىڭ «ەر ادام ءرولىن ۇزدىك سومداعانى ءۇشىن» اتالىمىن جەڭىپ العان- دى. سونىمەن قاتار، كارتينا II حالىقارالىق «ەۋرازيالىق كوپىر» اتتى كينوفەستيۆالىنە نەگىزگى كونكۋرسىنا قاتىسقان.

 ايتا كەتەلىك، «شىڭىراۋ» فيلمى دە داككاداعى كينوفەستيۆالدە جۇلدەمەن ماراپاتتالدى. فيلمنىڭ وپەراتورى ريۆقات يبراگيموۆتىڭ جۇمىسىن ازيا فيلمدەرى كونكۋرسىندا ۇزدىك دەپ تانىدى. فيلمنىڭ رەجيسسەرى - جانىبەك جەتىرۋوۆ. داككاداعى حالىقارالىق كينوفەستيۆال 1992 -جىلدان باستاپ وتكىزىلەدى. كينوفورۋم بانگلادەشدەگى بەدەلدى كينوفەستيۆال سانالادى. كينوفەستيۆالدىڭ ۇيىمداستىرۋ جۇمىستارىن Rainbow Film Society كلۋبى جاسايدى. فەستيۆالدىڭ نەگىزگى ماقساتى - بانگلادەش كورەرمەنىن الەمنىڭ مەينستريم فيلمدەرىمەن تانىستىرۋ جانە وتاندىق كينەماتوگرافياسىن دامىتۋ.

 

«داككا فەستيۆالىنە كورشى مەملەكەتتەردەن كەلگەن ساراپشىلار "شىڭىراۋعا" قاتتى قىزىعۋشىلىق تانىتىپ، ءوز فەستيۆالدەرىنە شاكىردى. فيلمنىڭ فەستيۆالدىك تاعدىرى ەندى باستالعالى تۇر. الاتىن بيىگى دە الدا دەپ ويلايمىن. قازىردىڭ وزىندە ەكى فەستيۆال ءوز انكەتالارىن جىبەرىپ ولارعا جاۋاپ جازىپ جىبەردىك» ، - دەدى جانىبەك جەتىرۋوۆ.

  بيىل داككاداعى كينوفەستيۆال 72 ەلدىڭ قاتىسۋشىلارىنىڭ باسىن قوستى. 220 كينولەنتا كورسەتىلدى.

 

 فەستيۆالدە «ازيا كينوسى» ، «رەتروسپەكتيۆا» ، «بانگلادەش پانوراماسى» ، «الەم كينوسى» ، «بالالار فيلمدەرى» ، «قىسقامەتراجدى جانە تاۋەلسىز فيلمدەر» ، «ايەل كينەماتوگرافيستەر» جانە «رۋحاني فيلمدەر» سەكتسيالارى جۇمىس ىستەدى.

 

 «ءبىزدىڭ قالانىڭ حانزاداسى» - بۇل بيبول ەسىمدى ەرەكشە بالا مەن مۋزىكانت قاسىمحان ەسىمدى قاريا تۋرالى اسەرلى وقيعا. ءفيلمنىڭ نەگىزگى جەلىسى - بالا مەن قارتتىڭ كەزدەيسوق كەزدەسۋى بولىپ تابىلادى.

 

بۇل فيلمدەگى دراماتيزم ءبىر- بىرىنە مۇلدە بوتەن باس كەيىپكەرلەردىڭ سوڭىندا ەتەنە جاقىن بولىپ كەتۋلەرى. فيلم - ادامنىڭ ادامگەرشىلىك قاسيەتتەرىنىڭ ارقاسىندا عانا شىن باقىتقا جەتۋگە بولاتىنىن كورسەتەدى.