وسكەمەندە تۇڭعىش رەت ميعا كۇردەلى وتا جاسالدى

وسكەمەن. قازاقپارات - وسكەمەندىك نەيروحيرۋرگتار ميىنا قان قۇيىلعان ناۋقاستى امان الىپ قالدى، دەپ حابارلايدى قازاقپارات ءتىلشىسى.

 شەمونايحا اۋدانىنىڭ تۇرعىنى سۆەتلانا ۆاگانوۆا 19 - قاڭتار كۇنى وبلىستىق ينسۋلت ورتالىعىنا تۇسكەن بولاتىن. كومپيۋتەرلىك توموگرافيا قانتامىرلاردىڭ جارىلۋى سالتارىنان ميعا قان قۇيىلعانىن انىقتايدى. جارىلعان تامىرلار تەرەڭدە جاتقاندىقتان باسۇيەكتى ويۋ قاۋىپتى بولعان. سوندىقتان، نەيروحيرۋرگتار انگيوگرافتىڭ كومەگىنە جۇگىنگەن.

«وتانى باسۇيەكتى ويماي- اق جاسادىق. سونىڭ ارقاسىندا قان جوعالتۋ بولعان جوق» دەيدى نەيروحيرۋرگ دميتري نەدبايلو.

قازىر سۆەتلانا ۆاگانوۆا ەركىن سويلەپ، كۇلە الادى. وزدىگىنەن قوزعالا باستاعان.

«وتادان كەيىن 3 ساعاتتان سوڭ ەس جيدىم. شەمونايحادا قالعان تۋىستارىم قاتتى الاڭداپتى. قىزدارىم ءالى قۋانىپ ءجۇر. بۇل كۇن ومىرىمدەگى ەرەكشە كۇن بولىپ قالارى ءسوزسىز» - دەيدى ول.

 جۋىقتا ورناتىلعان انگيوگرافتىڭ كومەگىمەن ورتالىق ماماندارى 39 جاستاعى سەمەيلىك جىگىتتىڭ دە ءومىرىن اراشالاپ قالعان. ۆاديم تكاچەنكو سەمەيدەن اۋىر حالدە جەتكىزىلىپتى. زەرتتەۋ بارىسىندا ونىڭ ىشكى ۇيقى قانتامىرى بىتەلىپ قالعانى انىقتالادى. وسىنىڭ سالدارىنان ميدىڭ سول جاق جارتىشارىنا قان جۇرمەي قالعان.

«مۇنىڭ سوڭى مي ينفارگىنا اكەدى. سوندىقتان ميدىڭ سول جاق جارتى شارىنا وتا جاساپ، سىرتقى ۇيقى قانتامىرعا توراپ جالعادىق. سول ارقىلى ميداعى قان اينالىم قالپىنا كەلدى» - دەيدى دميتري نەدبايلو.

وتا ءساتتى ءوتىپ، ناۋقاس كەلەسى كۇنى- اق ءجۇرىپ كەتكەن.

بىلتىر الىنعان انگيوگراف ينسۋلت ورتالىعىنداعى مامانداردىڭ جۇمىسىن اجەپتاۋىر جەڭىلدەتكەن. جارتى جىلدىڭ ىشىندە 200 دەن استام وتا جاسالىپتى. وعان دەيىن مۇنداي ناۋقاستاردى استانا مەن الماتىدا ەمدەلەتىن.