ءماجىلىس ءتوراعاسى قىرعىزستان ەلشىسىن قابىلدادى
تاراپتار ەكى ەل اراسىنداعى ىنتىماقتاستىقتى دامىتۋدىڭ وزەكتى سۇراقتارىن تالقىلادى.
ءماجىلىس سپيكەرىنىڭ پىكىرىنشە، ءبىزدىڭ ەلدەرىمىز پرەزيدەنتتەرى نۇرسۇلتان نازاربايەۆ پەن سوورونباي جەەنبەكوۆتىڭ ءوزارا تۇسىنىستىك پەن دوستىققا نەگىزدەلگەن، بىرلەسكەن جۇمىستارىنىڭ ناتيجەسىندە بۇگىندە ەكىجاقتى جانە كوپ قىرلى ىقپالداستىقتى نىعايتۋدىڭ جوعارعى كورسەتكىشتەرىنە قول جەتكىزىلدى.
الداعى ۋاقىتتا دا قازاقستان ءۇشىن باۋىرلاستىق، ستراتەگيالىق ارىپتەستىكتى ودان ءارى تەرەڭدەتۋ ماڭىزدى بولىپ قالا بەرمەك.
وسى رەتتە ن. نىعماتۋلين ەكى ەل راتيفيكاتسيالاعان قازاق- قىرعىز مەملەكەتتىك شەكاراسىن شەگەندەۋ تۋرالى شارت ءوزارا سەنىم مەن تاتۋكورشىلىك قاتىناستى نىعايتۋعا جول اشاتىنىن اتاپ ءوتتى.
ءوز كەزەگىندە قىرعىز ەلشىسى قوس مەملەكەت كوشباسشىلارىنىڭ سىندارلى ساياساتىنىڭ ارقاسىندا ەلدەرىمىز اراسىنداعى بايلانىس باسقا ەلدەرگە ۇلگى بولارلىق دەڭگەيدە دامىپ كەلە جاتقانىن، بولاشاقتا دا قازاقستان مەن قىرعىزستان اراسىنداعى ىنتىماقتاستىق الەۋەتىنىڭ زور ەكەنىن ايتتى.
ودان ءارى تاراپتار، بارلىق باعىتتا، سونىڭ ىشىندە، پارلامەنتارالىق قارىم- قاتىناستى كۇشەيتۋدىڭ ماڭىزدىلىعىنا توقتالدى.
كەزدەسۋ بارىسىندا پالاتا سپيكەرى قازاقستان پرەزيدەنتىنىڭ ەۋرازيالىق يدەياسىنىڭ 25 جىلدىعىنا وراي استانادا، قىركۇيەك ايىندا ەۋروپا جانە ازيا ەلدەرى پارلامەنتتەرى سپيكەرلەرىنىڭ ءتورتىنشى كەڭەسى وتەتىنىن ايتىپ، وعان قاتىسۋعا قىرعىزدىق ارىپتەستەرىن دە شاقىردى.
ن. نىعماتۋلين جاڭادان قىزمەتىنە كىرىسكەن ەلشىگە دەپۋتاتتىق كورپۋس اتىنان تابىس تىلەدى.