قازاقستان زيمبابۆەگە استىق پەن ەت جەتكىزۋگە دايىن
«زيمبابۆە پرەزيدەنتى ەممەرسون منانگاگۆا ءبىزدىڭ وڭىرگە بىرىنشە رەت ساپار شەگىپ وتىر. ءبىز 1992-جىلى ديپلوماتيالىق قارىم-قاتىناس ورناتتىق. سودان بەرى مەملەكەت باسشىلارى دەڭگەيىندە العاش رەت كەزدەسىپ وتىرمىز. ونى ايرىقشا اتاپ وتكىم كەلەدى. سوندىقتان بۇل كەزدەسۋدىڭ قازاقستان مەن زيمبابۆە قارىم-قاتىناسىندا ورتالىق ازيا مەن وڭتۇستىك افريكا اراسىنداعى ىقپالداستىقتى نىعايتۋ ءۇشىن تاريحي ماڭىز بار دەپ ەسەپتەۋگە بولادى»، - دەپ اتاپ ءوتتى ەلباسى.
ق ر پرەزيدەنتى بۇگىنگى كەلىسسوز تۇسىنىستىك پەن دوستىق جاعدايىندا ءوتىپ، ەكى ەلدىڭ اراسىنداعى قارىم-قاتىناستار، حالىقارالىق قاتىناستار جانە باسقا دا ماسەلەلەر قوزعالعانىن ايتتى.
«بۇگىنگى كەزدەسۋ بارىسىندا ساياسي ديلوگىمىزدى ودان ارى قولداپ، تومەن دەڭگەيدە قالىپ وتىرعان ساۋدا ىنتىماقتاستىعىمىزدى كەڭەيتۋگە ۋاعدالاستىق. الەمنىڭ بۇل ءوڭىرىنىڭ ەكونوميكاسىنا ءالى كىرە قويعانىمىز جوق. ساياسي دا، ەكونوميكالىق تا بايلانىس وتە تومەن. سەبەبى جەر شالعاي. بۇل وبەكتيۆتى سەبەپ. دەگەنمەن، جەكەلەگەن باعىتتاردا ءوزارا ءىس-قيمىلدى جولعا قويا الاتىندىعىمىزدى ايتتىق»، - دەدى نۇرسۇلتان نازاربايەۆ.
ەلباسىنىڭ اتاپ وتۋىنشە، زيمبابۆە قازاقستان سياقتى مول قازبا بايلىققا يە. ەكى ەلدىڭ اۋىل شارۋاشىلىعى دا ۇقساس بولىپ كەلەدى.
«سوندىقتان قازاقستان بۇل ماسەلەلەردىڭ بارلىعىن دا قاراستىرا الادى. تاۋ-كەن ونەركاسىبى سالاسىنداعى ىنتىماقتاستىق پەن تاجىريبە الماسۋعا بەيىل. مۇنان بولەك، زيمبابۆەگە استىق، ەت جانە وزگە دە اۋىل شارۋاشىلىعى تاۋارلارىن جەتكىزۋ ماسەلەلەرىن قاراستىرۋعا دايىن. بۇگىنگى ساۋدا-ساتتىق كولەمى ۇلكەن ەمەس. ءبىز زيمبابۆە تاباعىن عانا يمپورتتاپ وتىرمىز»، - دەدى نۇرسۇلتان نازاربايەۆ.