ترامپ شەكارانى تۇتاس دۋالمەن قورشاۋ يدەياسىنان باس تارتتى

استانا. قازاقپارات - ا ق ش پرەزيدەنتى دونالد ترامپ سەنبى كۇنى حالىققا ارناعان مالىمدەمەسىندە مەكسيكامەن شەكاراداعى دۋال قۇرىلىسىن قارجىلاندىرۋ مەن «شاتداۋندى» (ۇكىمەت جۇمىسىنىڭ جارتىلاي توقتاۋى) توقتاتۋعا قاتىستى ۇسىنىستارىن جەتكىزدى.

ترامپ مەكسيكامەن شەكارادا تۇرعىزىلۋى ءتيىس دەپ ەسەپتەيتىن دۋالدىڭ ورنىنا 370 شاقىرىمعا سوزىلاتىن بوگەت (بارەر) سالۋدى ۇسىندى. ءبىراق بۇل جولى دا وعان 5,7 ميلليارد دوللار قاجەتتىگىن ايتتى.

ا ق ش پەن مەكسيكا اراسىنداعى قۇرلىقتىق شەكارانىڭ ۇزىندىعى - 3145 مەتر. «شامامەن 1050 شاقىرىم ءتۇرلى قورشاۋلارمەن بەكىتىلگەن» دەپ جازدى BBC. بۇعان قوسا، ترامپ ا ق ش- تىڭ شەكارا- كەدەن قىزمەتىنە جاڭادان 2750 قىزمەتكەر الۋدى ۇسىندى. ول سونىمەن بىرگە ميگرانتتار ءىسىن قارايتىن سوتتاردىڭ سانىن ارتتىرۋ قاجەتتىگىن ايتتى. ترامپ كونگرەسسكە ا ق ش- قا بالا كەزىندە كەلگەن زاڭسىز ميگرانتتاردى ءۇش جىل قۇقىقتىق قورعاۋعا الۋدى جانە ەل اۋماعىندا ءجۇرىپ- تۇرۋ مەرزىمى اياقتالعان ميگرانتتاردى دەپورتاتسيالاماۋدى ۇسىنعان.

بۇعان دەيىن ترامپ كونگرەستەن وڭتۇستىك شەكاراعا دۋال تۇرعىزۋعا بەس ميلليارد دوللاردان استام قاراجات سۇراعان. ءبىراق ا ق ش كونگرەسىندە سانى باسىم دەموكراتتار مەكسيكامەن شەكارادا قابىرعا قۇرىلىسىن قارجىلاندىرۋدان باس تارتىپ، ونىڭ سوڭى ۇكىمەت جۇمىسىنىڭ ءىشىنارا توقتاۋىنا اكەلگەن.

22 - جەلتوقساننان بەرى ا ق ش- تىڭ 800 مىڭ مەملەكەتتىك قىزمەتكەرى ايلىقسىز قالعان. Bloomberg اگەنتتىگىنىڭ جازۋىنشا، ا ق ش- تا «شاتداۋن» كەسىرىنەن ءار ەكى اپتادا ءوندىرىس 0,1 پايىزعا قىسقارىپ وتىر.

10- قاڭتاردا ترامپ مەكسيكامەن شەكارادا قابىرعا تۇرعىزۋ ماسەلەسى شەشىلمەسە، ەلدە توتەنشە جاعداي جاريالانۋى مۇمكىن دەپ مالىمدەگەن.

كەيىن بەلگىلى بولعانداي، ا ق ش كونگرەسسىندەگى دەموكراتتار پرەزيدەنت دونالد ترامپتىڭ فەدەرالدىق ۇكىمەت جۇمىسىن جانداندىرۋ ماسەلەسى تۋرالى ۇسىنىستارىن قابىلداماي تاستادى. دەموكراتتار ۇسىنىستى سەناتتا جانە وكىلدەر پالاتاسىندا قابىلداتپاي تاستايتىندارىن مالىمدەدى.

سەناتتاعى دەموكراتتار جەتەكشىسى چاك شۋمەر ا ق ش- قا بالا كەزىندە زاڭسىز كەلگەن ميگرانتتار مەن باسقا دا ميگرانتتاردىڭ ماسەلەسى ءۇش جىلعا كەيىنگە شەگەرىلمەي، تۇپكىلىكتى شەشىلۋى ءتيىس دەپ سانايدى. وكىلدەر پالاتاسىنىڭ سپيكەرى نەنسي پەلوسي پرەزيدەنت ترامپتىڭ ۇسىنىسىن «قيسىنسىز» دەپ اتادى. دەموكراتتار ميگراتسيالىق رەفورمانى فەدەرالدىق ۇكىمەت جۇمىسى جانداندىرىلعان سوڭ عانا تالقىلاۋعا دايىن ەكەنىن ءبىلدىردى. ولار ترامپتىڭ باستى تالابى - شەكارادا قابىرعا تۇرعىزۋعا قارجى بولۋگە ءۇزىلدى- كەسىلدى قارسى.

www.azattyq.org