ۇلىن سوعىستان الىپ قالعان باقسىنىڭ قۇپياسى

نۇر-سۇلتان. قازاقپارات - تۇركىستان قالاسىنىڭ قوسقورعان اۋىلىندا تۇرعان قالدىباي باقسىنىڭ باسىنان كوپتەگەن ادام سەنگىسىز وقيعالار وتكەن.

ءتىپتى ۇلى وتان سوعىسى كەزىندە قوبىزدىڭ كومەگىمەن ەكى رەت ۇلىن اسكەردەن الىپ قالعان دەپ جازادى «زامانا» باسىلىمى.

قالدىباي باقسى 1890-جىلى تۋىلىپتى. ونىڭ ەكى ۇلى، ءبىر قىزى بولعان. قازىر 20 دان اسا نەمەرە مەن 40 قا جۋىق شوبەرەلەرى ءومىر ءسۇرىپ جاتىر.

ۇلى وتان سوعىسى باستالعاندا باقسى كولحوزدىڭ 800 قويىن باعىپ جۇرگەن. ۇلى فازىلاح ونىڭ كومەكشىسى بولعان ەكەن.

سوعىس باستالعاننان كەيىن 1941-جىلى جەلتوقساندا ۇلىن اسكەري كوميسسارياتقا شاقىرتادى.

مۇنى ەستىگەن باقسى تۇنىمەن قوبىزىن تارتىپ، تاڭەرتەڭ ۇلىن اسكەري كوميسارياتقا شىعارىپ سالعان.

الايدا جول بويى ۇلىنىڭ كوزىنەن جاس توقتاماي اعىپ، ونى كورگەن كوز دارىگەرى ونى اۋرۋحاناعا جاتقىزىپ، اسكەرگە جىبەرمەيدى.

وسىدان ەكى جىل وتكەن سوڭ فازىلاحتى تاعى دا اسكەرگە شاقىرعان. بۇل جولى دا قالدىباي باقسى قوبىزىن تۇنىمەن زارلاتىپ، زىكىر سالىپ، تاڭەرتەڭ بالاسىن اسكەري كوميسسارياتقا اتتاندىرعان.

كوميسسيا الدىنا بارعان فازىلاحتىڭ تاعى دا كوز كىناراتى تابىلعان، سونىمەن قاتار باسى اينالىپ، قۇسقىسى كەلىپ، قۇلاپ قالاتىنداي جاعدايدا بولعان. كوميسسيا باسشىسى ونى اسكەرگە جارامسىز دەپ تاپقان.

وسى ءبىر ءتىلسىم جاعدايدىڭ قۇپياسى سول كۇيى اشىلماپتى. ۇلى دا، اكەسى دە بۇل جايىندا ەشكىمگە ءتىس جارماعان.