ماڭدايداعى اجىمدەر قانداي قورقىنىشتى دەرتتەن بەلگى بەرەدى؟

 استانا. قازاقپارات - فرانسياداعى تۋلۋزا ۋنيۆەرسيتەتىنىڭ عالىمدارى ماڭدايدا جاستايىنان ءاجىمنىڭ پايدا بولۋى قاۋىپتى دەرتتىڭ بەلگىسى بولۋى مۇمكىن ەكەنىن ايتىپ، دابىل قاقتى.

بۇل تۋرالى Oxu.Az سايتى حابارلايدى.

عالىمدار 20 جىل بويى 3,2 مىڭ دەنى ساۋ ادامنىڭ جاعدايىن باقىلاپ، ولاردىڭ ماڭدايىنداعى اجىمدەرى مەن كەي اۋرۋ تۇرلەرىنىڭ اراسىندا بايلانىس بارىن انىقتادى.

ماماندار جاس كەزىنەن ماڭدايىندا كوپ ءاجىمى بار ادامدار جۇرەك-قان تامىرلارى اۋرۋىنا شالدىعىپ، مەزگىلسىز قازاعا دۋشار بولۋى مۇمكىن ەكەنىن ايتۋدا.

زەرتتەۋ كەزىندە 233 ادام ءتۇرلى سەبەپتەرمەن قايتىس بولعانى انىقتالعان. ولاردىڭ 15,2 پايىزىندا ماڭدايىندا كەمىندە ەكى ءاجىمى بولىپتى.

عالىمدار ماڭدايى اجىمگە تولى ادامداردىڭ ينسۋلتكە شالدىعۋ مۇمكىندىگى ون ەسەگە ارتا تۇسەتىنىن العا تارتتى.