ەلىمىزدە يمامدار مەن ءدىن قىزمەتكەرلەرى قانشا جالاقى الادى؟

استانا. قازاقپارات - باس مۇفتي سەرىكباي قاجى ورازدىڭ شەشىمەن ءوزىن-ءوزى قاراجاتپەن قامتاماسىز ەتە المايتىن مەشىتتەردىڭ يمامدارىنا 50 مىڭ تەڭگە كولەمىندە جالاقى بەرىلدى.

بۇل تۋرالى ق م د ب باسپا ءسوز قىزمەتى حابارلادى.

«قاجىلىق قورى» ەسەبىنەن 103 يمامعا قارجى اۋدارىلعان.

«ەلىمىز بويىنشا 2058 اۋىلدىق مەشىت بار. ونىڭ باسىم بولىگى ءوزىن-ءوزى قاراجاتپەن قامتاماسىز ەتە المايتىن مەشىتتەر.

اۋىلدا ايلىقسىز قىزمەت ەتەتىن ءدىن قىزمەتكەرلەرىن تولىقتاي جالاقىمەن قامتاماسىز ەتۋ جوسپارىمىزدا بار. العاشقى كەزەڭ بويىنشا بۇگىن 103 اۋىل يمامىنا «قاجىلىق قورى» ەسەبىنەن 50 مىڭ تەڭگە قاراجات اۋدارىلدى.

وسىلايشا، يمامداردىڭ الەۋمەتتىك ماسەلەسىن كەزەڭ-كەزەڭىمەن شەشۋدى كوزدەپ وتىرمىز»، - دەپ اتاپ ءوتتى ق م د ب ءتوراعاسى سەرىكباي قاجى وراز.

ايتا كەتەيىك، ەلىمىز بويىنشا 2626 مەشىتتە 6189 ادام قىزمەت ەتەدى. ونىڭ 4 مىڭعا جۋىعى - ءدىن قىزمەتكەرى.

جالپى ءدىن قىزمەتكەرلەرىنىڭ 30 پايىزى عانا تولىققاندى جالاقىمەن قامتاماسىز ەتىلگەن.