قازاقستاندا بالا اسىراپ الۋعا كومەكتەسەتىن ارنايى اگەنتتىك قۇرىلادى

استانا. قازاقپارات - قازاقستاندا بالا اسىراپ الۋ بويىنشا مەملەكەتتىك ەمەس اگەنتتىك قۇرىلادى، دەپ حابارلايدى قازاقپارات ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ 2018 -جىلعى 28 -قاراشادا وتكەن ازاماتتىق فورۋمدا «انا ءۇيى» قوعامدىق قورى نەگىزىندە بالا اسىراپ الۋ جونىندەگى مەملەكەتتىك ەمەس اگەنتتىك قۇرۋ، ونى رەگلامەنتتەۋ جانە ونىڭ قىزمەت اتقارۋىن قامتاماسىز ەتۋ جونىندە تاپسىرما بەرگەن بولاتىن. وسىعان وراي، ءبىلىم جانە عىلىم مينيسترلىگى ارنايى جۇمىس جۇرگىزۋدە.

«اتالعان تاپسىرمانى ورىنداۋعا قاتىستى ۇسىنىستار ازىرلەۋ ءۇشىن جۇمىس توبى قۇرىلدى. ونىڭ قۇرامىنا جوعارعى سوت، باس پروكۋراتۋرا، ادىلەت، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، قوعامدىق دامۋ مينيسترلىكتەرىنىڭ، «اتامەكەن» ۇلتتىق كاسىپكەرلەر پالاتاسىنىڭ وكىلدەرى، سونداي- اق حالىقارالىق جانە قوعامدىق ۇيىمداردىڭ وكىلدەرى ەندى. سونىمەن قاتار، بالا اسىراپ الۋ جونىندەگى وسى سياقتى اگەنتتىكتەردىڭ جۇمىسى بويىنشا حالىقارالىق تاجىريبە زەردەلەندى. وسىلايشا، جۇمىس توبىنىڭ مۇشەلەرىنەن بالا اسىراپ الۋ جونىندەگى مەملەكەتتىك ەمەس اگەنتتىكتەردى قۇرۋ تۋرالى ۇسىنىستار كەلىپ ءتۇسىپ جاتىر» دەلىنگەن حابارلامادا. وسى اگەنتتىكتەردىڭ جۇمىسى جونىندەگى بارلىق ۇسىنىستار جۇمىس توبىنىڭ وتىرىسىندا تالقىلانادى.