قازاقستاندىق بالالار فيلمى حالىقارالىق كينوفەستيۆالدە جۇلدە الدى

استانا. قازاقپارات - ش. ايمانوۆ اتىنداعى «قازاق فيلم» ا ق تۇسىرگەن «ءبىزدىڭ قالانىڭ حانزاداسى» كوركەم فيلمى بانگلادەشتە وتكەن حالىقارالىق كينوفەستيۆالدە جۇلدەگە يە بولدى، دەپ حابارلايدى قازاقپارات ءتىلشىسى. 

اعىمداعى جىلدىڭ 9-18 - قاڭتارى ارالىعىندا داككە قالاسىندا حالىقارالىق كينوفەستيۆال وتكەن بولاتىن. وسى فەستيۆالدە قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا «اديگۋل پروداكشن» كينوكومپانياسىنىڭ قاتىسۋىمەن ش. ايمانوۆ اتىنداعى «قازاق فيلم» اق تۇسىرگەن «ءبىزدىڭ قالانىڭ حانزاداسى» تۋىندىسى «ەڭ ۇزدىك بالالار فيلمى» جۇلدەسىن جەڭىپ الدى.

ايتا كەتەيىك، «ءبىزدىڭ قالانىڭ حانزاداسى» كوركەم فيلمى جالعىزدىقتىڭ كۇيىن كەشىپ جۇرگەن بالالار ءۇيىنىڭ 6 جاسار تاربيەلەنۋشىسى مەن قارتتار ءۇيىنىڭ ارداگەرى اراسىنداعى دوستىعىن باياندايدى. فيلمنىڭ رەجيسسەرى ءارى سسەناري اۆتورى - قازاقستاننىڭ حالىق ءارتىسى تالعات تەمەنوۆ («ادامدار اراسىنداعى بولتىرىك»، «قىزعىش قۇس»، «ماحاببات بەكەتى»). باستى رولدەردى ءانۋار تولەۋعاجى جانە تولەۋبەك ارالباي («جاۋجۇرەك مىڭ بالا»، «جويۋشى»، «تىعىرىقتان جول تاپقان» ) سومدادى.

سونىمەن قاتار، فيلمگە ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق- دراما تەاترىنىڭ (استانا قالاسى) اكتەرلەرى تۇسكەن. فيلمنىڭ ءتۇسىرىلىم جۇمىستارى استانادا جانە اقمولا وبلىسىنىڭ بۋراباي اۋىلىندا وتكەن. كارتينانىڭ تۇساۋكەسەرى 2017 -جىلى 1 - ماۋسىمدا، حالىقارالىق بالالاردى قورعاۋ كۇنىنە وراي استانا قالاسىندا وتكەن بولاتىن. ال قازان ايىندا ەلىمىزدىڭ كينوتەاترلارىنان كورسەتىلگەن. سونىمەن قاتار، اتالمىش كينوتۋىندى قىركۇيەك ايىندا رەسەيدە وتكەن 2 - حالىقارالىق «ەۋرازيالىق كوپىر» كينوفەستيۆالىنىڭ نەگىزگى باعدارلاماسى شەڭبەرىندە كورسەتىلگەن ەدى.

ايتا كەتەرلىگى، فيلمدە باستى ءرولدى سومداعان اكتەر، قازاقستاننىڭ ەڭبەك سىڭىرگەن قايراتكەرى تولەۋبەك ارالباي قىتايدا وتكەن كينوفەستيۆالدە «ۇزدىك ەر ادام ءرولى» جۇلدەسىمەن ماراپاتتالعان بولاتىن.