بەلارۋس پرەزيدەنتى رەسەيمەن ورتاق ۆاليۋتاعا قارسى ەمەس ەكەنىن ايتتى
بۇل تۋرالى «ازاتتىق» سايتى حابارلادى.
لۋكاشەنكونىڭ پىكىرىنشە، ورتاق ۆاليۋتا شارتتارى ەكى ەلگە دە ءتيىمدى بولۋى ءتيىس. بۇل تۇرعىدا ەۋرووداقتىڭ تاجىريبەسىنەن ۇلگى الىپ، زەرتتەۋ كەرەك دەپ سانايدى.
بەلارۋستىڭ قازىرگى جانە بۇرىنعى شەنەۋنىكتەرىمەن كەزدەسۋدە لۋكاشەنكو رەسەيمەن وداق قۇرۋ ماسەلەسىنە دە توقتالىپ، ونى ەكى ەل تۇرعىندارى شەشۋى ءتيىس دەپ ايتقان. ول سونىمەن بىرگە مەملەكەتتىڭ وزگە ەلدەرمەن دە «وداقتاسۋعا» قۇقىعى بار ەكەنىن جەتكىزگەن.
رەسەي مەن بەلارۋس اراسىنداعى ورتاق ۆاليۋتا ماسەلەسىن بۇعان دەيىن رەسەي پرەمەر- ءمينيسترى دميتري مەدۆەديەۆ تە قوزعاعان. ول رەسەيدىڭ بەلارۋسپەن بىرلەسىپ، اقشا شىعاراتىن ورتالىق، كەدەن قىزمەتى، سوت جانە ەسەپ پالاتاسىن قۇرۋعا ءازىر ەكەنىن مالىمدەگەن. ونىڭ سوزىنشە، مۇنداي جاعدايدا ەكى مەملەكەت ورتاق سالىق ساياساتىن جۇرگىزە الادى.
ال 14 - جەلتوقساندا لۋكاشەنكو رەسەيلىك جۋرناليستەرمەن كەزدەسۋدە ءوزى ءۇشىن «قاسيەتتى» ۇعىمعا اينالعان مەملەكەتتىڭ ەگەمەندىگىنەن ايرىلۋىنا ەشقاشان جول بەرمەيتىنىن مالىمدەگەن.
كەيىن الەۋمەتتىك جەلىدە «ەكى ەل قوسىلادى ەكەن» دەگەن اقپارات تاراپ، قىزۋ تالقىعا تۇسكەن. سول كەزدە رەسەي پرەزيدەنتىنىڭ كومەكشىسى دميتريي پەسكوۆ بۇل اقپاراتتى تەرىستەپ، تۇسىنىكتەمە بەرگەن.