قازاقستاندىق اسكەريلەر موڭعوليادا وتەتىن حالىقارالىق «اراۆت» مارافونىنا قاتىسادى

استانا. قازاقپارات - ەلىمىزدىڭ اسكەري قىزمەتكەرلەرى موڭعوليادا وتەتىن «اراۆت» حالىقارالىق اتتار مارافونىنا دايىندىقتى باستادى، دەپ حابارلايدى قازاقپارات ق ر قورعانىس مينيسترلىگىنە سىلتەمە جاساپ.

«وڭتۇستىك» وڭىرلىك قولباسشىلىعىنىڭ تاۋ- قورىقشىلار بولىمشەسىندە 2019 -جىلعى حالىقارالىق ارميا ويىندارى شەڭبەرىندە «اراۆت» حالىقارالىق اتتار مارافونىنا دايىندىق باستالدى. اراۆت - بۇل 10 ادامنان تۇراتىن اتتى جاۋىنگەرلەر روتاسى.

 قازاقستان ارمياسى اتالعان شاراعا قاتىسۋعا نيەت ءبىلدىردى. قازىرگى ۋاقىتتا تاۋ- قورىقشىلار بولىمشەسىندە 10 نەگىزگى جانە 3 قوسالقى اسكەري قىزمەتكەردەن تۇراتىن كوماندانى قۇرۋ ءۇشىن ىرىكتەۋ جۇرگىزىلۋدە»، - دەلىنگەن حابارلامادا.

 كوماندا قۇرامىنا سنايپەر، پۋلەمەتشى، گراناتا اتقىش، بايلانىسشى، ساپەر، مەرگەن جانە مەديتسينالىق نۇسقاۋشى كىرەدى. سايىس ەكى كەزەڭنەن تۇرادى. ءبىرىنشى كەزەڭدە اتتى جاۋىنگەرلەر تاۋلى جانە ورماندى جەرلەر ارقىلى 130 شاقىرىمدىق سۋ جولى مەن مينالار الاڭىنان كەدەرگىسىز ءوتۋى ءتيىس.

سونداي- اق، ارقاننىڭ كومەگىمەن اتتى ۇستاۋ، ونى جۇگەندەۋ جانە ەرتتەۋ قاجەت، سول سياقتى ات ۇستىندە جارالى اسكەريلەر مەن وق- دارىلەردى تاسىمالداۋ تاپسىرماسى بار.

ەكىنشى كەزەڭدە اسكەري قىزمەتكەرلەر بەلگىلەنگەن ۋاقىت ىشىندە كەدەرگىلەر جولاعىن ەڭسەرۋ مەن اسكەري قارۋمەن وق اتۋدان باسەكەگە تۇسەدى. ودان بولەك، ورنىندا تۇرىپ جانە اتپەن شابۋ بارىسىندا گراناتا لاقتىرۋ سىناعى قاراستىرىلعان.

«اراۆت» - حالىقارالىق ارميا ويىندارى قۇرامىنداعى جاڭا بايقاۋ. مارافوندا اتتاردى موڭعوليا ەلى ۇسىنادى، قاتىسۋشىلارعا ءوزىنىڭ ات ابزەلىن عانا پايدالانۋعا رۇقسات ەتىلگەن. قاتىسۋشى اسكەري قىزمەتشىنىڭ سالماعى 85 كەلىدەن اسپاۋى ءتيىس، سونداي- اق، جارىستا جىبەرىلگەن ءاربىر قاتەلىك پەن كەشەۋىلدەۋگە ايىپپۇل سالىنادى. ەڭ ورەسكەل بۇزۋشىلىق جىلقىنى جاراقاتتاۋ، ونداي جاعدايدا قاتىسۋشى بىردەن بايقاۋدان شىعادى. بايقاۋ ۇستىمىزدەگى جىلدىڭ تامىز ايىنىڭ باسىندا موڭعوليادا وتەدى»، - دەپ حابارلايدى مينيسترلىك.

اۆتور: داۋلەت ىزتىلەۋ