قازاقستاندىقتاردىڭ ءال- اۋقاتىن جىلقى ەتى يندەكسىمەن انىقتاۋعا بولادى

 استانا. قازاقپارات - ەكونوميست ەۆگەني كوچەتوۆ قازاقستاننىڭ بارلىق وڭىرىندەگى ەت يندەكسىن جاساپ شىعاردى، دەپ حابارلايدى قازاقپارات.

«الەمدە ەلدىڭ اۋقاتتىلىعىن انىقتايتىن بىرنەشە يندەكس بار. ماسەلەن، رەسەيدە «بۋتەربرود يندەكسى» ، ۆاليۋتانىڭ ناقتى قۇنىن انىقتايتىن «بيگ ماك» يندەكسى بار. وعان بالاما رەتىندە « ET INDEX-ىن» ۇسىنامىن» ، - دەدى ەۆگەنيي كوچەتوۆ.

قازاقستاندىق يندەكستىڭ نەگىزى رەتىندە جىلقى ەتى تاڭداپ الىنعان، سەبەبى ءدال وسى جىلقى ەتى ۇلتتىق اسحانادا ماڭىزدى ءرول وينايدى. ياعني، يندەكستە قازاقستاندىقتاردىڭ جىلقى ەتىن ساتىپ الۋ مۇمكىندىگى قاراستىرىلادى.

«ماسەلەن، قاڭتار ايىندا اتىراۋلىقتاردىڭ تابىسى شامامەن 112 كەلى ەت الۋعا مۇمكىندىك بەرەدى. ەڭ تومەن كورسەتكىش تۇركىستان وبلىسىندا تىركەلگەن، ءوڭىر تۇرعىندارى ايىنا 27 كەلى ەت الا الادى. ءبىراق، ءبىر كەلى جىلقى ەتىنىڭ باعاسى اتىراۋدا 1680 تەڭگە بولسا، تۇركىستان وبىلسىندا - 1600 تەڭگە» ، - دەپ اتاپ ءوتتى ە. كوچەتوۆ.

 ونىڭ ايتۋىنشا، « ET INDEX» ءار ايدىڭ 15- كۇنى جۇرگىزىلەدى جانە وسىلايشا وڭىرلەردەگى حالىقتىڭ ءال- اۋقاتىن انىقتاۋعا بولادى.

قاڭتار ايىنداعى يندەكسكە سايكەس، ەڭ كوپ جىلقى ەتىن اتىراۋ وبلىسىنىڭ تۇرعىندارى الا الادى - ءار ادامعا 112 كەلى ەتتەن كەلەدى. ماڭعىستاۋ وبلىسىندا بۇل كورسەتكىش 75 كەلىنى، استانا مەن الماتىدا 74 جانە 71 كەلىنى كورسەتكەن. باتىس قازاقستان وبىلسىندا - ءاربىر تۇرعىن ايىنا 61 ك گ جىلقى ەتىن الا الادى. ەڭ تومەن كورسەتكىش شىمكەنت قالاسى (35 كەلى) مەن تۇركىستان وبىلسىندا (27 كەلى) تىركەلدى.

ەت باعاسىنا كەلسەك، ەڭ قىمبات جىلقى ەتى الماتى قالاسىندا ساتىلادى (ءبىر كەلىسى - 2000 تەڭگە) . ەڭ ارزان ەت شىعىس قازاقستان وبلىسىندا (1527 تەڭگە) . اۋداندار اراسىندا ەڭ قىمبات باعا الماتى وبلىسىنىڭ ىلە اۋدانىندا (1 كەلى جىلقى ەتى - 2150 تەڭگە) ، ەڭ ارزان باعا - پاۆلودار وبلىسىنىڭ جەلەزين اۋدانىندا (1370 تەڭگە) .

تولىق ەسەپتى ەكونوميست ءوزىنىڭ Facebook پاراقشاسىندا جاريالادى.