اعىلشىن تاريحشىسىنىڭ گيمالاي اسقان قازاقتار جايلى كىتابى قازاق جانە ورىس تىلىندە جارىققا شىقتى
بۇل تۋرالى فەيسبۋك پاراقشاسىندا بىرنەشە كىتاپ اۆتورى، «AmalBooks» باسپاسىنىڭ جەتەكشىسى باقىتجان بۇقارباي جازدى، دەپ حابارلايدى قازاقپارات ءتىلشىسى.
«ءبىز 63 جىل بويى تاريح قويناۋىندا كومىلىپ كەلگەن كىتاپتى جارىققا شىعاردىق. گودفري لاياستىڭ «اسپانتاۋ اسقان ۇركىن كوش» كىتابى تۋرالى بىرنەشە فاكتى كەلتىرە كەتەيىن» ، - دەپ جازادى باقىتجان بۇقارباي.
«AmalBooks» باسپاسىنىڭ جەتەكشىسىنىڭ اتاپ وتۋىنشە، بىرىنشىدەن، اعىلشىن تاريحشىسى گودفري لاياس 1954 -جىلى ىستانبۇلعا بارىپ، قىتاي كوممۋنيستەرىنەن قاشۋ ارقىلى بوستاندىق قۇقىعىن تاڭداپ، ءشول جانە بۇلاناي ارقىلى ۇدەرە كوشكەن قازاقتارمەن كەزدەسكەن. ەكىنشىدەن، اعىلشىن تىلىندەگى بۇل كىتاپ 1956 -جىلى لوندوندا جارىق كورىپ، شىڭجاڭ قازاقتارىنىڭ كوممۋنيستىك رەجىمگە قارسى كۇرەسى تاقىرىبىنداعى تەڭدەسى جوق العاشقى جاريالانعان ەڭبەك بولىپ تابىلادى.
«ۇشىنشىدەن، كىتاپتى ورىس جانە قازاق تىلدەرىنە اۋدارۋ جۇمىسىن «AmalBooks» باسپاسى جۇرگىزدى. كىتاپتى ورىس تىلىنە ءوزىم اۋداردىم. ون كۇنىم كەتتى. جۇمىس 12 كۇننىڭ ىشىندە مەنىڭ باسشىلىعىممەن 78 ۇمىتكەردەن تاڭدالعان اۋدارماشىلار توبىمەن قازاق تىلىنە اۋدارىلدى. تورتىنشىدەن، كىتاپ قازاقتاردىڭ ءومىرى تۋرالى تاڭعالارلىق مالىمەتتەرگە، ولاردىڭ كۇرەس ستراتەگيالارى تۋرالى دەرەكتەرگە تولى. مىسالى، كوممۋنيستەر كەلگەنگە دەيىن قازاقتار اعىلشىن ءتىلىن ۇيرەنگەنىن بىلەسىز بە؟ بۇل جەردە اڭگىمە ⅩⅩعاسىردىڭ ءبىرىنشى جارتىسى تۋرالى بولىپ وتىر. كوممۋنيستەر بۇل ىسكە اقىرى تىيىم سالدى. بولماسا كەيبىر ونەرتانۋشىلارىمىز ايتىپ جۇرگەندەي، قارا جورعانىڭ موڭعول ءبيى ەمەس، قازاقتىڭ ءبيى ەكەنىن ءبىلدىڭىز بە؟ قازاقتار كەڭەستىك يادرولىق باعدارلاماسىنىڭ بىرتىندەپ ىسكە اسىرىلۋىنا كەدەرگى كەلتىرگەنى تۋرالى ەستۋىڭىز بار ما؟ نوبەل سىيلىعىنىڭ لاۋرەاتى اتانعان دالاي- لامانىڭ 15 جاستا لحاسادا قازاق جاستارىن قۇتقارىپ قالعانىنان حابارىڭىز بار ما؟ بارلىعىن ەكى اۋىز سوزبەن جەتكىزۋ مۇمكىن ەمەس» ، - دەپ جازادى ول.
باقىتجان بۇقارباي كىتاپتىڭ قازاق جانە ورىس تىلدەرىندە شىعارىلۋى ءبىزدىڭ تاريحىمىز ءۇشىن بىرەگەي جاڭالىق ەكەنىن اتاپ وتەدى. سونداي- اق، بۇل كىتاپ ىزدەنۋشىلەر ءۇشىن جاڭا ىزدەنىستەرگە جول اشادى.
«ماسەلەن، قازىرگى زامانعى برەيك- دانسقا ۇقساس، قازاقتىڭ «ەلىك ءبيى» تۋرالى ەستىگەنىڭىز بار ما؟ سونىمەن بىرگە، قازاقتاردىڭ كوممۋنيستەرمەن ءۇندىستان شەكاراسىندا بولعان ايقاسىن ءۇندى شەكاراشىلارى بەينەتاسپاعا ءتۇسىرىپ العان. «اسپانتاۋ اسقان ۇركىن كوش» كىتابى قازىردىڭ وزىندە ساتىلىمدا» ، - دەپ جازادى باقىتجان بۇقارباي.