مەشىت ماڭىنان تابىلعان مۇرا

  استانا. قازاقپارات - قىزىلوردا وبلىسى قازالى قالاسىنداعى عاني مۇراتبايەۆتىڭ مەموريالدىق مۋزەيىندە ءبىر عاسىر بۇرىنعى كۇرەك ساقتاۋلى تۇر.

قازالى قالاسىندا تاريحي عيماراتتار كوپ. سولاردىڭ ءبىرى - نۇرالى مەشىتى. ونى1915 -جىلى ءمۇرالىم مەركەمالوۆ دەگەن ساۋداگەر سالدىرعان ەكەن. الايدا، كەڭەس وداعى تۇسىندا اسكەري كازارماعا، كەيىن ەمحاناعا، ءدارىحاناعا، كلۋبقا اينالعان. تاۋەلسىزدىك جاريالانعان 1991 -جىلى مەشىت بولىپ ەسىگىن قايتا ايقارا اشادى.

وسى مەشىتتە قىزمەت ەتەتىن مولدا باراحات جاپاق ۇلى ەكى جىل بۇرىن تاريحي عيماراتتىڭ اۋماعىنان 20 عاسىردىڭ باسىندا جاسالعان تەمىر كۇرەك تاۋىپ الادى.

«مەشىتتىڭ اۋلاسىن اراكىدىك تازالايتىنبىز. قوقىس جيناپ، جەر اۋداراتىنبىز. سونداي ءبىر كۇنى ءبىر مەتردەي تەرەڭدىكتەن كۇرەك تاۋىپ الدىم. تەمىردەن قۇيىلعان. ءبىراق ابدەن توت باسقان ەكەن. وسى مەشىتتى سالعان قۇرىلىسشىلاردىڭ قۇرالى سياقتى» ، - دەيدى ب. جاپاق ۇلى.

ول مەشىت ماڭىنان تابىلعان مۇرانى عاني مۇراتبايەۆتىڭ مەموريالدىق مۋزەيىنە وتكىزەدى.

«بۇل جادىگەر بويىنشا تاريحشى عالىمدار ءوز پايىمدارىن ايتتى. ولار كۇرەك ءبىر عاسىر ۋاقىت بۇرىن جاسالعان دەپ وتىر. ءبىر قىزىعى، كۇرەكتىڭ ەش جەرىندە بەكىتپەلەر جوق. شەبەر ۇستانىڭ قولىنان شىققان قۇرال» ، - دەيدى مۋزەيدىڭ قور ساقتاۋشىسى الىبەك سەرالى.

 

يبراش ءالي

BAQ. KZ