فۋتبول دوبى قالاي جاسالادى؟
بۇل ەرەجە زامان تالابىنا سايكەس وزگەرگەنىمەن نەگىزى قاعيداسىن ۇستانىپ قالدى. دوپتى قالاي جاسايدى؟ قانەكەي، بىلەيىك! دوپ شار تارىزدەس بولۋى قاجەت جانە سينتەتيكالىق ماتەريالدان جاسالۋى ءتيىس. ديامەترى 34-35 سانتيمەتردى قۇراماسا، سالماعى 450 گراممنان اسپاۋى كەرەك. قىسىمى - 0,6-1,1 اتموسفەرعا تەڭ.
1872 -جىلى رەسمي تۇردە دوپتىڭ ستاندارتتى ولشەمى مەن سالماعى بەكىتىلدى. دوپ كامەرادان جانە سىرتقى قابىنان تۇرادى. سىرتى تابيعي بىلعارىدان جانە 18 ءوزارا تىگىلگەن پانەلدەن قۇرالعان. 1960 -جىلداردىڭ باسىندا دوپتى تولىقتاي سينتەتيكادان جاساي باستادى. تابيعي بىلعارى 1980 -جىلدارعا دەيىن قولدانىپ كەلگەن، الايدا سوڭىندا دوپتى تەك سينتەتيكالىق ماتەريالدان تىگەتىن بولدى. بىلعارى سۋ تارتقاننان سوڭ دوپتىڭ سالماعى اۋىرلايتىن.
قازىرگى دوپتاردىڭ باسىم كوپشىلىگى سۋ وتكىزبەيتىن 32 پانەلدەن تۇرادى. ونىڭ 12 ءسى بەس بۇرىشتى بولسا، قالعان 20 سى التى بۇرىشتى. پانەلدەر ءوزارا قولمەن نەمەسە تىگىس ماشيناسىمەن تىگىلەدى. كەيبىر جاعايدا تەك جەلىمدەيدى. سىرتى مەن ىشكى كامەرانىڭ اراسىندا توسەم بولادى. دوپتىڭ ساپاسى ءدال وسى توسەمنىڭ قالىڭدىعىنا بايلانىستى. ول دوپتىڭ ۇشۋ باعىتىنا اسەر ەتىپ، ونىڭ ءپىشىنىن ساقتاپ تۇرادى. كامەراسىن سينتەتيكالىق بيتۋلدەن نەمەسە تابيعي لاتەكستەن جاسايدى.
وتاندىق فۋتبولشىلارىمىز Adidas كومپانياسىنىڭ Conext 19 دوبىمەن وينايدى. تىگىسى جوق، ءبىرىڭعاي پانەلدەن تۇراتىن Conext 19 دوبى 1998 -جىلى فرانتسيادا وتكەن مۋنديالداعى داڭقتى Tricolore دوبىنا ۇقساتىپ جاسالعان.
ايبار رىسداۋلەت
Massaget.kz