تۇركىستاندا تاريحي مۇرالاردى قورعاۋ جونىندە كوشپەلى وتىرىس ءوتتى

 تۇركىستان. قازاقپارات - تۇركىستان قالاسىندا قازاقستان رەسپۋبليكاسى پارلامەنتى ءماجىلىسى الەۋمەتتىك - مادەني دامۋ كوميتەتىنىڭ «تاريحي- مادەني مۇرانى قورعاۋ مەن كەڭىنەن تانىتۋدى زاڭنامالىق تۇرعىدان قامتاماسىز ەتۋ» تاقىرىبىنداعى كوشپەلى وتىرىسى ءوتتى، دەپ حابارلايدى قازاقپارات ءتىلشىسى.

وتىرىس جۇمىسىنا ق ر پارلامەنتى ءماجىلىسىنىڭ دەپۋتاتتارى - الەۋمەتتىك- مادەني دامۋ كوميتەتىنىڭ مۇشەلەرى مەن تۇركىستان وبلىسىنىڭ اكىمى جانسەيىت تۇمەبايەۆ، مەملەكەتتىك ورگانداردىڭ قىزمەتكەرلەرى مەن قوعام، مادەنيەت، ارحەولوگيا ۇيىمدارىنىڭ وكىلدەرى، ساراپشىلار جانە ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتى مەن قازاقستاننىڭ باسقا دا جوعارى وقۋ ورىندارىنىڭ عالىمدارى قاتىستى.

كوشپەلى وتىرىستا تاريحي- مادەني مۇرانى قورعاۋ مەن ونى كەڭىنەن تانىتۋدى زاڭنامالىق تۇرعىدان قامتاماسىز ەتۋ ماسەلەلەرى قارالدى. «تاريحي- مادەني مۇرا وبەكتىلەرىن قورعاۋ جانە پايدالانۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاريحي- مادەني مۇرا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭ جوبالارى تالقىلاندى.

 

زاڭ جوبالارىندا تاريحي- مادەني مۇرا وبەكتىلەرىن انىقتاۋ مەن ولاردى ەسەپكە الۋ، تاريحي- مادەني ساراپتاما جۇرگىزۋ مەن نىسانداردى قۇجاتتاندىرۋ ماسەلەلەرىنە ەرەكشە نازار اۋدارىلعان. دەپۋتاتتار جانە كوميتەت وتىرىسىنا قاتىسۋشىلار بۇگىنگى تاڭدا كوپتەگەن جاڭادان انىقتالعان تاريحي جانە مادەنيەت ەسكەرتكىشتەرى مارتەبەسى بەرىلگەن وبەكتىلەردىڭ ساقتالۋى جەتكىلىكتى دەڭگەيدە قامتاماسىز ەتىلمەيتىنىن اتاپ كورسەتتى.

ماسەلەن، ەلىمىزدە 25 مىڭنان استام تاريحي- مادەني مۇرا وبەكتىلەرى بار بولسا، ولاردىڭ 11 مىڭعا جۋىعىنا تاريح جانە مادەنيەت ەسكەرتكىشتەرى مارتەبەسى بەرىلگەن. بۇل نىساندار بۇگىندە ءتيىمدى پايدالانۋدى، ۇتىمدى باسقارۋدى جانە ولاردى ساقتاۋ مەن قورعاۋ بويىنشا زاڭ، اكىمشىلىك شارالاردى قامتاماسىز ەتۋدى تالاپ ەتەتىن جالپى ۇلتتىق مادەني بايلىق بولىپ تابىلادى.