اتىراۋدا قازاقتىڭ اتاقتى ءۇش بيىنە ەسكەرتكىش ورناتىلدى

 اتىراۋ. قازاقپارات - اتىراۋدا تولە، قازىبەك جانە ايتەكە بيگە الىپ ەسكەرتكىش قويىلدى، دەپ حابارلايدى قازاقپارات وڭىرلىك كوممۋنيكاتسيالار قىزمەتىنە سىلتەمە جاساپ.

وبلىستىق سوت عيماراتىنىڭ ورتالىق كىرە بەرىسىندە قازاق بيلەرىنە ەسكەرتكىش ورناتىلدى. مەرەكەلىك شاراعا اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ، اتىراۋ وبلىستىق سوتىنىڭ ءتوراعاسى مارعۇلان بەكتۇرعانوۆ جانە قازاقستان كاسىپوداقتار فەدەراتسياسىنىڭ ءتوراعاسى باقىتجان ءابدىرايىم، زيالى قاۋىم وكىلدەرى جانە اقىندار قاتىستى.

 وبلىس اكىمىنىڭ ءبىرىنشى ورىنباسارى سەرىك شاپكەنوۆ ءوزىنىڭ قۇتتىقتاۋ سوزىندە ەسكەرتكىشتىڭ اشىلۋى - بۇل مۇنايلى ايماقتىڭ قوعامدىق جانە مادەني ومىرىندەگى ماڭىزدى وقيعا ەكەنىن اتاپ ءوتتى.

«جوبا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جۇزەگە اسىرىلدى. قازاقستان حالقى تاريحتاعى ەڭ كۇردەلى كەزەڭدە قازاقتاردى بىرىكتىرۋدە شەشۋشى ءرول اتقارىپ، ەلدىڭ ەركىندىگى مەن تاۋەلسىزدىگى ءۇشىن كۇرەسكەن ۇلى بيلەر - تولە، قازىبەك جانە ايتەكەنى قۇرمەتتەپ، ەشقاشان ەستەن شىعارمايدى. بۇل - ۇرپاق ساباقتاستىعى، داستۇرلەر جالعاسى. ەسكەرتكىش وبلىستىق سوت عيماراتىنىڭ جانىندا كەزدەيسوق ورناتىلماعان، بۇل - قازاق حالقىنىڭ دانالىعى، ادىلدىگى مەن ابىرويىنىڭ سيمۆولى» ، - دەيدى سەرىك شاپكەنوۆ.

ايتا كەتەيىك، ەسكەرتكىشتىڭ بيىكتىگى - 4 مەتر. قولادان جاسالعان جانە ءمارمار تۇعىردا ورنالاسقان. ەسكەرتكىشتىڭ اۆتورى - اتاقتى قازاقستاندىق ءمۇسىنشى باقىتبەك مۇحامەتجانوۆ.