پولشالىق ينۆەستورلار تۇركىستان وبلىسىندا زاۋىت سالادى
زاماناۋي تەحنولوگيالار تۇركىستان قالاسى اۋماعىنداعى جاڭا اكىمشىلىك عيماراتتار مەن تۇرعىن ءۇي كەشەندەرىن سالۋ كەزىندە قولدانىلماق، دەپ حابارلايدى قازاقپارات ءتىلشىسى.
«تۇركىستان» ا ك ك» ا ق فيليالى - «TURKISTAN INVEST» كومپانياسىنىڭ سىرتقى بايلانىستار جونىندەگى باسقارۋشى ديرەكتورى بايان كايۋپوۆانىڭ مالىمەتىنشە، مۇنداي شەشىم شەتەلدىك كاسىپكەرلەردىڭ تۇركىستانعا ارنايى ساپارى بارىسىندا قابىلدانعان. TURKISTAN INVEST باسشىلىعى مەن پولشالىق FCA كومپانياسىنىڭ وكىلدەرى اراسىندا كەزدەسكەن.
اتالعان كومپانيا - پولشاداعى وپتيكالىق تەليەۆيزيالىق جۇيەلەر مەن بايلانىس جەلىلەرىن قۇرۋ ءۇشىن پايدالانىلاتىن تالشىقتى- وپتيكالىق جۇيەلەر سالاسىندا قىزمەت ەتىپ جۇرگەن ەڭ ءىرى كومپانيالاردىڭ ءبىرى. ونىڭ ونىمدەرى جوعارى ساپالى، ۇنەمدى، بەرىك جانە ادەمى ديزايندا شىعارىلادى. تاعى ءبىر ماڭىزدى تۇسى - وندىرىلگەن ءونىم باعالارى نارىقتىق باعادان تومەن بولادى، جانە دە تۇركىستان وڭىرىندەگى تالشىقتى- وپتيكالىق جۇيەلەر سالاسىنداعى تۇڭعىش ءوندىرىس وشاعى بولماق. الداعى ۋاقىتتا جوبانى جۇزەگە اسىرۋ جانە ىسكە قوسۋ اياسىندا جەرگىلىكتى ماماندار پولشادا كاسىبي وقۋدان وتەدى.
كەزدەسۋ قورىتىندىسى بويىنشا تاراپتار ورتاق جۇمىس جوسپارىن تۇزۋگە كەلىستى. وعان سايكەس TURKISTAN INVEST قىزمەتكەرلەرى جوبانىڭ ءار كەزەڭىندە ينۆەستورلارعا سۇيەمەلدەۋ كورسەتەدى.
سونىمەن قاتار، تۇركىستان وبلىسىنا جاساعان ءىس- ساپار اياسىندا پولياك كاسىپكەرلەرى احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ باسشىلىعىمەن كەزدەستى. FCA وكىلدەرى تەلەكوممۋنيكاتسيا جانە بايلانىس سالاسىندا قاجەتتى كادرلاردى دايارلاۋدا ۋنيۆەرسيتەتپەن ىنتىماقتاستىق ورناتۋعا نيەت ءبىلدىردى. كەلىسسوز بارىسىندا بولاشاق ماماندار تەوريانى تاجىريبەمەن بىرىكتىرۋگە قولايلى زەرتحانا قۇرۋ تۋرالى ۇسىنىس ايتىلدى. ءوز كەزەگىندە، ح ق ت ۋ باسشىلارى ءوزارا ءتيىمدى ارىپتەستىككە دايىن ەكەندىكتەرىن ءبىلدىردى.
ايتا كەتەيىك، TURKISTAN INVEST كومپانياسى مەن FCA پولياك كومپانياسى اراسىنداعى ىنتىماقتاستىق 2018 -جىلدىڭ قىركۇيەگىندە تۇركىستان قالاسىندا وتكەن «ەجەلگى تۇركىستان - جاڭا مۇمكىندىكتەر» اتتى حالىقارالىق فورۋم اياسىندا باستالعان بولاتىن.