ەلباسى «اقىلدى قالامەن» تانىسىپ شىقتى
بۇگىندە ول جەردە ارنايى احۋالدىق ورتالىقتان قالانىڭ بارلىق ينفراقۇرىلىمى اۆتوماتتى تۇردە باسقارىلادى، دەپ حابارلايدى قازاقپارات ءتىلشىسى.
ايتا كەتكەن ءجون، «Smart Aqkol» جوباسىن «قازاق تەلەكوم» ا ق، Tengrilab جانە ەۋرازيالىق توپ ىسكە اسىردى. قالادا 17,5 شاقىرىم تالشىقتى-وپتيكالىق بايلانىس جەلىسى تارتىلىپ، قوعامدىق Wi-Fi جانە LTE جەلىسى جاڭارتىلدى. وسىنىڭ ارقاسىندا 100 گە جۋىق بەينەكامەرا، 4500 سۋ ەسەپتەۋ قۇرىلعىسى، 6000 ەلەكتر ەنەرگياسىن ەسەپتەۋ قۇرالى، جول ترافيگى، ءورت قاۋىپسىزدىگى، كوشەنى جارىقتاندىرۋ جانە باسقا دا قۇرىلعىلار ءبىر ورتالىقتان باسقارىلادى.
احۋالدىق ورتالىقتا ديسپەتچەرلىك زال، بەينەبايلانىس جۇيەسى جانە call-ورتالىق بار. بەينەباقىلاۋ جۇيەسىنىڭ بارلىق سيگنالدارى ارنايى LED ەكراندارعا شىعارىلادى. وسىلايشا، احۋالدىق ورتالىق ارقىلى ۆەدومستۆوارالىق ءوزارا ءىس-قيمىل ۇيىمداستىرىلادى، قالا ءومىرىن تاكتيكالىق جانە ستراتەگيالىق جاعىنان باسقارۋ شارالارى جۇرگىزىلەدى. ال بارلىق اقپارات بۋنكەرلىك تيپتەگى دەرەكتەردى وڭدەۋ ورتالىعىندا ساقتالادى. اتالعان ورتالىق جەردىڭ استىندا ورنالاسقان.
ساپار بارىسىندا مەملەكەت باسشىسى تۇرعىن ءۇي-كوممۋنالدىق قىزمەتتەردى قاشىقتان باسقارۋ، قالا تىرشىلىگىن قامتاماسىز ەتۋ، جول قوزعالىسىن رەتتەۋ، قوعامدىق قاۋىپسىزدىك پەن ەكولوگيالىق جاعدايدى باقىلاۋعا ارنالعان تەحنولوگيالارمەن تانىستى. ماسەلەن، اقكولدە ءاربىر ءۇيدىڭ سۋدى تۇتىنۋ كولەمى اۆتوماتتى تۇردە ەسەپتەلەدى. وسىلايشا، 70 جاستاعى زەينەتكەر ايەلدىڭ ءۇش كۇن بويى سۋ مەن ەلەكتر ەنەرگيانى قولدانباعانى انىقتالدى. احۋالدىق ورتالىق ماماندارى ول اقپاراتتى بىردەن قۇزىرەتتى ورگاندارعا جەتكىزدى. سويتسە، ءۇيدىڭ يەسى استانادا تۇراتىن بالالارىنا بارىپ كەلگەن. سول سياقتى سۋ كوپ كەتىپ جاتسا، قۇبىردىڭ جارىلعانىن جىلدام تابۋعا بولادى.
اقكولدە بارلىق بەينەكامەرالار اۆتوماتتى تۇردە تالداۋ جۇيەسىنە قوسىلعان. ادامنىڭ بەت-الپەتىن تانۋ تەحنولوگياسى دا بار. ءتىپتى، كەز كەلگەن ادامنىڭ فوتوسىن جۇكتەپ، بەينەكامەرالار ارقىلى ىزدەستىرىپ كورۋگە بولادى. ادامدار كوپ جينالاتىن جەرلەر، سونداي-اق، قاراۋسىز قالعان زاتتار مەن قارۋ-جاراق اۆتوماتتى تۇردە انىقتالادى. اەروستاتتان بەينەباقىلاۋ اپپاراتى دا بار. وسى ۋاقىتقا دەيىن جاڭا جۇيەنىڭ ارقاسىندا بىرنەشە ءتارتىپ بۇزۋشى قولعا ءتۇستى. بۇدان بولەك، كامەرالار قالاعا كىرەتىن جانە شىعاتىن كولىكتەردى تىركەپ وتىرادى.
Tengrilab كومپانياسىنىڭ باسشىسى ءالىمجان ەسەتوۆتىڭ ايتۋىنشا، اقكول قالاسىندا ەنگىزىلگەن كەيبىر تەحنولوگيالار تمد اۋماعىندا العاش رەت قولعا الىنىپ وتىر. «بۇل جەردە كوممۋنالدىق قىزمەتتەر تولىعىمەن تسيفرلىق جۇيەگە اۋىستىرىلدى. قازاقستان بويىنشا اقكول قالاسى ونى ءبىرىنشى بولىپ ىسكە اسىرىپ وتىر. «Smart Aqkol» جوباسىنىڭ پلاتفورماسى جاساندى ينتەللەكتكە نەگىزدەلگەن. سونىڭ ارقاسىندا اۋا-رايىنىڭ وزگەرۋى، اۋانىڭ لاستانۋى، ۇيلەردىڭ ىشىندەگى تەمپەراتۋرا، ءتىپتى، اۋرۋحاناعا حالىقتىڭ قانشالىقتى كوپ كەلگەنىن، ءبارى - ءبارىن باقىلاپ وتىرۋعا مۇمكىندىك بار. ءبىز اتالعان تەحنولوگيالاردى ەلىمىزدىڭ باسقا ايماقتارىنا دا تاراتۋعا دايىنبىز. وسى جوباعا شامامەن 2,5 ميلليارد تەڭگە كەتتى»، - دەدى ءا. ەسەتوۆ.
پرەزيدەنت «Smart Aqkol»- ءدىڭ تاجىريبەسىن باسقا قالالارعا تاراتۋ جاعىن پىسىقتاۋدى تاپسىردى. سەبەبى جاڭا تەحنولوگيالاردىڭ ارقاسىندا بارلىق پروتسەستەردى جىلدام ءارى ءتيىمدى تۇردە باسقارۋعا بولادى. «كومپانيانى، يا بولماسا، كاسىپورىندى قالاي باسقارامىز، سيفرلىق تەحنولوگيالاردىڭ ارقاسىندا قازاقستاندى دا تۋرا سولاي ءبىرىڭعاي ورتالىقتان باسقارۋعا بولادى. مىنە، مىنا جەردە تۇتاس ءبىر قالانى باسقارىپ وتىرمىز. ونداي جۇيەنىڭ ارتىقشىلىعى كوپ، ەكونوميكالىق تيىمدىلىگى دە جوعارى. ناقتى ناتيجە دەپ وسىنى ايتۋ كەرەك»، - دەپ اتاپ كورسەتتى ن. نازاربايەۆ.