باعدات ءاشىموۆا: اسەكەڭ كەرەۋەتتى ۇرىپ، «بالالارىم، مەنى نەگە تاستاپ كەتتىڭدەر» دەگەن كەزدە وزىمە سەرت بەردىم

استانا. قازاقپارات - ءبىر كەزدەرى جۇبايىنان، ارتىنشا قوس بىردەي ۇلىنان ايىرىلعان ابدەن قاجىپ، ومىردەن ءتۇڭىلىپ كەتتى. اۋرۋحاناعا ءتۇستى. ال قالعان ومىرىنە ساۋلەسىن شاشىپ، نۇرىن سەپكەن جۇبايىن سول ەمحانادان كەزدەستىردى.

 باعدات ءاشىموۆا ۇلتتىق ارنا تۇسىرگەن دەرەكتى فيلمدە اسانالى ءاشىموۆتىڭ ومىردەن تۇڭىلگەن ساتتەرى جايلى ايتىپ بەردى، دەپ جازادى Stan.kz.

اسانالى ءاشىموۆتىڭ العاشقى جارى، شاڭىراعىنىڭ ۇيىتقىسى مايرا 1993 -جىلى قايتىس بولدى.

«سول سىناقتان سۇرىنبەي ءوتتى. قانداي جاعدايعا ۇشىراپ كەتەر ەكەن دەپ قورىقتىق. ەڭ الدىمەن، مايرا قايتىس بولدى. ونىڭ ارتىنشا ءمادي قايتىس بولدى. ەكەۋىنىڭ اراسى 6 عانا اي. ساعي قايتىس بولدى. ول قانداي ەدى؟ وزدەرىڭىز بىلەسىزدەر، كەشەگى شوقاندى ويناپ، جارقىراپ جۇرگەن ساعي قازاقشا ايتسام، كوز ءتيدى مە بىلمەيمىن. ايتەۋىر اللا تاعالا جۇلدىز ەتىپ الىپ كەلدى دە، جاسىنان الىپ كەتتى»، - دەپ ەسكە الادى اكتەردىڭ قارىنداسى امانتاي سەرىك قىزى.

ال بۇگىندە شاڭىراعىنىڭ ءتۇتىنىن تۇتەتىپ وتىرعان باعدات ءاشىموۆا اكتەردىڭ ومىردەن ءتۇڭىلىپ كەتكەن كەزىن كورگەندە وزىنە سەرت بەرگەنىن ايتادى. ول پەرزەنتتەرىنەن ايىرىلعان اكەنى باقىتتى ەتكىسى كەلگەن.

«ەسىمدە، سۋ الايىن دەپ استىنا ءتۇسىپ كەتكەنمىن. قايتا كوتەرىلىپ كەلگەن كەزدە كەرەۋەتتىڭ كەرنەۋىن ۇرىپ: - اتتەڭ، بالالارىم، مەنى نەگە جالعىز تاستاپ كەتتىڭدەر؟ - دەگەن داۋىستى ەستىدىم. سول مينۋتتان باستاپ مەن وزىمە سەرت بەردىم. ءبىر مينۋت، ءبىر ءسات قالدىرماۋعا... ارينە، جۇرەكتەگى جارا جازىلمايدى عوي. ءبىراق سول جارانىڭ اشىلماۋىنا قىزمەت ەتەمىن دەپ»، - دەيدى ءاشىموۆا.

2002 -جىلى حالقى سۇيگەن اسانالى ءاشىموۆ ابدەن قاجىپ، ومىردەن ءتۇڭىلىپ، اۋرۋحاناعا تۇسكەن. قالعان عۇمىرىنا ءۇمىت وتىن جاققان بەينەنى اقساقال اكتەر اق حالاتتىلاردىڭ اراسىنان جولىقتىردى.

«تاڭ اتا قاتتى تولعانىس، تەبىرەنىستىڭ ۇستىندە: - اتتەڭ، الاشتىڭ ازاماتى، ەلدىڭ ەركەسى، باسىنا وسىنداي اۋىرتپالىقتىڭ تۇسكەنىن- اي، ءبىر بالا قاسىندا بولعاندا عوي. مەنىڭ قولىمدا بولسا، مەن بۇل كىسىنى باقىتتى ەتەر ەدىم، - دەپ وزىمشە قيالدادىم»، - دەيدى باعدات ءاشىموۆا.

بۇگىندە اسانالى جانە باعدات اشىموۆتەردىڭ ورتاق ۇلى 11 جاستا. ونىڭ دا ەسىمى اسانالى. اتۇستارىنا بۇل ەسىمدى اناسىنىڭ ءوزى بەرگەن.

«مەن قويدىم. ۇل بالا ەكەنىن بىلگەننەن كەيىن اسەكەڭە قولقا سالدىم. ارينە، تۇسىنەمىن. قازاقتا مۇنداي ءۇردىس جوق. ومىردەن جاس كەتە ما، كارى كەتە ما، ءبىر قۇدايدىڭ قولىندا عوي. وسى بالانىڭ اتىن ءسىزدىڭ اتىڭىزبەن قويساق؟! كوزىم جۇمىلعانشا وسى ات اتالىپ تۇرسا ەكەن، ءىزىڭىزدى باسسا ەكەن. سىزدەي بولماسا دا، ءسىزدىڭ باسقان ءىزىڭىزدى جاڭعىرتىپ وتىرسا ەكەن دەگەن مەندە تىلەك بولدى»، - دەيدى باعدات ءاشىموۆا.

بۇگىندە كىشكەنتاي اسانالى اكەسى سياقتى اكتەر بولۋدى ارماندايدى. ول ەلىمىزدە تۇسىرىلگەن «توميريس» فيلمىنىڭ كاستينگىنە قاتىسىپ، باعىن سىناپ ۇلگەرگەن دە كورىنەدى.

Stan.kz