قازاقستاندا ۇلتتىق ءبىرىڭعاي تەستىلەۋ باستالدى

استانا. قازاقپارات - بۇگىن قازاقستاندا ۇلتتىق ءبىرىڭعاي تەستىلەۋدى وتكىزۋ شارالارى باستالدى، دەپ حابارلايدى قازاقپارات.

اتاپ ايتقاندا، 2019-جىلدان باستاپ جوعارى وقۋ ورنىنا اقىلى نەگىزدە ءتۇسۋ ءۇشىن ۇ ب ت- نى جىلىنا 4 رەت (قاڭتار، ناۋرىز، ماۋسىم، تامىز) تاپسىرۋعا بولادى. ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن وقۋعا تۇسۋشىلەر ماۋسىم ايىندا وتەتىن ۇ ب ت- نى تاپسىرۋى قاجەت.

«جالپى، سىناقتى تاپسىرۋ فورماتىندا وزگەرىس جوق. بۇل نورما جوعارى ءبىلىم الۋعا قولجەتىمدىلىكتى ارتتىرۋ ماقساتىندا ەنگىزىلدى»، - دەلىنگەن ءبىلىم جانە عىلىم مينيسترلىگى مالىمەتىندە.

ۇلتتىق ءبىرىڭعاي تەستىلەۋدى وتكىزۋ قاعيدالارىنا سايكەس، 2019-جىلعى 18-20- قاڭتار ارالىعىندا ۇ ب ت وتكىزۋدىڭ 74 پۋنكتى بازاسىندا تەستىلەۋ جۇرگىزىلەدى.

ەسكە سالا كەتەيىك، ۇ ب ت- عا قاتىسۋ ءۇشىن قۇجاتتاردى قابىلداۋ ءبىرىڭعاي اقپاراتتىق جۇيە ارقىلى 2018-جىلعى 1-15- جەلتوقسان ارالىعىندا جۇزەگە اسىرىلدى. ناتيجەسىندە، تەستىلەۋگە قاتىسۋعا 35838 ادام ءوتىنىش ءبىلدىردى. ونىڭ ىشىندە، قازاق تىلىندە - 25615، ورىس تىلىندە - 10162, اعىلشىن تىلىندە - 61 وقۋشى.

ۇ ب ت وتكىزۋ ءۇشىن جەرگىلىكتى جەرلەردە 444 ادامنان تۇراتىن ۇ ب ت ۇيىمداستىرۋ جانە وتكىزۋ بويىنشا مەملەكەتتىك كوميسسيا قۇرىلدى. ونىڭ قۇرامىنا وبلىستار نەمەسە رەسپۋبليكالىق ماڭىزى بار قالالار اكىمدىكتەرىنىڭ وكىلدەرى، قۇقىق قورعاۋ ورگاندارىنىڭ، قوعامدىق ۇيىمداردىڭ، بۇقارالىق اقپارات قۇرالدارىنىڭ وكىلدەرى كىرەدى. قاڭتار ايىندا وتكىزىلەتىن سىناقتا 520 اۋديتوريا پايدالانىلادى.

بۇدان بۇرىن حابارلانعانداي، مينيسترلىك وكىلى 2019-جىلى وتكىزىلەتىن ۇلتتىق ءبىرىڭعاي تەستىلەۋدىڭ نازار اۋدارارلىق بەس پۋنكتىن اتاعان بولاتىن.