ءبىز ومىرگە ادام بولۋ ءۇشىن كەلدىك: ديماش قۇدايبەرگەن ەڭ باستى قۇندىلىق جايلى ايتتى
ديماشتىڭ ايتۋىنشا، اسپان استى ەلىندەگى Singer جوباسىنىڭ ۇيىمداستىرۋشىلارى وعان «تاجىريبە» ەسەبىندە قاراعان، دەپ جازادى Stan.kz.
«بۇل كوپشىلىك ويلاعانداي، The Voice, X-factor سياقتى جوبا ەمەس. بۇل - 14 كەزەڭنەن تۇراتىن قىتاي مەملەكەتىندەگى 35-40 جىلدان بەرى ساحنادا جۇرگەن ۇلكەن جۇلدىزداردىڭ جانە دە قىتايدا جاستار اراسىندا وتە تانىمال بولىپ كەلە جاتقان جۇلدىزداردىڭ بايقاۋى. مەنى تاجىريبە ەسەبىندە كورىپ قالىپ، شاقىرا قالعان. باسىندا سول قىتايدىڭ ىشىندە مەن عانا تانىمال ەمەس بولدىم. قاي ەلدەن كەلدى، كىم كەلدى دەگەندەي. بۇرىن قاتىسقان بايقاۋلارىم وسى جوباعا جول اشتى. وسى جوبا بۇگىنگى مەنىڭ كونسەرتتەرىمە جول اشتى. ءبارى ءوز ساتىمەن، جاراتۋشىنىڭ قالاۋىمەن، رەتىمەن كەلە جاتىر. وعان تىلەۋلەس بولىپ وتىرعان اعايىن بار، ۇستازدارىم، اكە-شەشەم بار. وسىنىڭ ءبارىن جيناقتاعاندا ءبارى ويداعىداي بولىپ جاتىر»، - دەيدى ديماش اعىنان جارىلىپ.
ديماش I am a Singer جوباسىندا ءوزىن ءبىراز مەملەكەتتەرگە تانىستىرعان اندەردى ورىنداعانىن، ءبارىنىڭ كوڭىلىنەن شىعۋعا تىرىسقانىن ايتادى.
سونداي-اق، ديماش ەۋروپا تورىندە وتكەن العاشقى ءان كەشى جايلى ايتا كەتتى. ول بريتاندىقتاردىڭ ءوزىن جىلى قابىلداعانىن قۋانا ايتتى. ايتكەنمەن، لوندوندا ازياداعىداي ۇلكەن ستاديون جيناي المايتىنىن اتاپ ءوتتى.
«زالدا ورىن بولماعاندىعى جانە كورەرمەندەردىڭ ىستىق ىقىلاسپەن، ۇلكەن جۇرەگىمەن، كەڭ پەيىلمەن قابىلداعانى مەنى قاتتى قۋانتتى. بۇل - مەنىڭ جەكە ءومىربايانىمدا جازىلىپ قالاتىن ەۋروپاداعى ەڭ العاشقى جەكە كونسەرتىم.
ازياداعىداي ستاديون جيناي المايمىن، ارينە. ءبىراق ءۇش مىڭ ادام جينالدى، بۇل ءبىرىنشى كونسەرتىم. سونىڭ وزىندە ءبىر كۇنگە جەتەر جەتپەس ۋاقىتتا بيلەتتەر ساتىلىپ كەتىپ، مەنى قۋانتىپ قويدى»، - دەيدى ديماش.
«تانىمالدىلىقتىڭ جۇگىن قالاي كوتەرەسىڭ؟» دەگەن ساۋالعا ديماش ومار حايامنىڭ سوزىمەن جاۋاپ بەردى.
«نە زاۆيدۋيتە تەم، كتو ۋداچليۆ ي بوگات، ۆەد زا راسسۆەتوم ۆسەگدا ناستۋپاەت زاكات» دەيدى. وسى جەردە مىناداي وي تۋىندايدى. ءاربىر نارسە جاقسى بولسىن، جامان بولسىن، ول ومىردەگى ءبىر ءسات. ادامنىڭ رۋحاني قۇندىلىعى ونىڭ كاسىبي بىلىكتىلىگىنەن ماڭىزدى دەپ بىلەمىن. ويتكەنى ءبىز ءبارىمىز بۇل ومىرگە ەڭ الدىمەن، ادام بولۋ ءۇشىن كەلدىك. ءانشى بولۋ ءۇشىن، مۇعالىم بولۋ ءۇشىن ەمەس. ەڭ الدىمەن، ادامي قاسيەتتەردى، رۋحاني قۇندىلىقتاردى بايىپپەن ساقتاپ قالۋ كەرەك»، - دەيدى ديماش.
ايتا كەتەيىك، بۇعان دەيىن ديماشتىڭ ەسىمى «الەمنىڭ ەڭ ۇزدىك 100 ءانشىسى» تىزىمىنە كىردى. بۇل تىزىمدە ەكىنشى ورىنعا دەيىن كوتەرىلگەن ديماش اياق استىنان 369-ورىنعا ءتۇسىپ قالدى. بۇعان دەيىن فاناتتاردىڭ داۋىس بەرۋ ناتيجەسىنە كۇمانمەن قاراپ وتىرعانىن جازعان ەدىك.