قاراعاندىدا قاتتى قاپتاماسى بار دارىلەر ءوندىرىسى ىسكە قوسىلدى

استانا. قازاقپارات - قاراعاندىدا «فيتوحيميا» حالىقارالىق عىلىمي-وندىرىستىك حولدينگى ەلىمىزدە العاشقىلاردىڭ ءبىرى بولىپ قاتتى قابىعى بار دارىلەر ءوندىرىسىن ىسكە قوستى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

يننوۆاتسيالىق جوبا «عىلىم قورى» ا ق قارجىلىق قولداۋىنىڭ كومەگىمەن جۇزەگە اسىرىلۋدا. جابدىقتار گەرمانيادان ساتىپ الىندى.

«جوبا ەلباسىنىڭ ۇلت جوسپارىنداعى 64-قادامدا بەلگىلەنگەن عىلىمي جۇمىستاردى كوممەرتسيالاندىرۋ شەڭبەرىندە ويلاستىرىلعان. 2016-جىلى قاراعاندىلىق عالىمدار اتالمىش جوبامەن بايقاۋدى جەڭىپ، ناتيجەسىندە عىلىم قورى 100 ميلليون تەڭگە ءبولدى. پرەپاراتتى بىردەن «ارگلابين ناتيۆنىي» جۇمىس اتاۋىمەن تىركەدى. قازىرگى تاڭدا ول كلينيكالىق سىناقتان ءوتىپ جاتىر. دەگەنمەن قازىردىڭ وزىندە اتالمىش يممۋنتۇرلەندىرۋشى شەت ەلدىك بالامالارىنان كەم تۇسپەيدى دەپ ايتۋعا بولادى. بۇعان قوسا ونىڭ وزىندىك ارتىقشىلىعى بار - ونىڭ قۇنى يمپورتتىق دارىلەردەن اناعۇرلىم ارزانىراق»، - دەدى «عىلىم قورى» ا ق باسقارما ءتوراعاسى انۋاربەك سۇلتانعازين.

«فيتوحيميا» ح ع ءو ح باس ديرەكتورى سەرعازى ادەكەنوۆتىڭ ايتۋىنشا، تانىستىرۋعا كەلگەن يزرايلدىك فارماتسيەۆتەر مەن بيزنەسمەندەر قاراعاندىلىقتارمەن سەرىكتەستىك ورناتۋعا قىزىعۋشىلىق تانىتۋدا. كەلەشەكتە ولار وسىندا دارىلىك سۋبستانتسيا الىپ كەلىپ، قاتتى قاپتامامەن قاپتاپ، قازاقستاندا تىركەيدى جانە حالىقارالىق نارىققا جىلجىتادى.

قاتتى قاپتاماداعى دارىلەر ىشۋگە ىڭعايلى، سەبەبى دارمەكتىڭ اشى ءدامى سەزىلمەيدى. سونىمەن قاتار باعىتتى اسەر ەتۋىنىڭ ارقاسىندا ءدارىنىڭ تيىمدىلىگى ارتادى.

«بۇگىنگى تاڭدا قاراعاندىدا 17 كاسىپورىندى بىرىكتىرەتىن فارماتسيەۆتيكالىق كلاستەر ءساتتى جۇمىس ىستەۋدە. كلاستەردىڭ ەڭ باستى ولشەمشارتتارىنىڭ ءبىرى يننوۆاتسيالىق تەحنولوگيالاردى ەنگىزۋ بولىپ تابىلادى»، - دەپ اتاپ ءوتتى سەرعازى ادەكەنوۆ.

ول جاڭا تەحنولوگيالار وتاندىق دارىلەردىڭ قۇنىن تومەندەتۋگە مۇمكىندىك بەرەتىنىن جەتكىزدى. وندىرىستىك شىعىندار ەكى-ءۇش ەسە تومەندەيدى. حولدينگ تاعى وسى سەكىلدى بەس ماشينا ساتىپ الىپ، وندىرەتىن ونىمدەر جەلىسىن كەڭەيتۋدى جوسپارلاپ وتىر.

«عىلىم قورى» ا ق «فيتوحيميا» ح ع ءو ح» ا ق بىرلەسىپ «تۇپنۇسقالى يممۋنتۇرلەندىرۋشى دارمەكتى ءوندىرۋدى جانە جاڭا سىناق پرەپاراتتارىن شىعارۋدى ۇيىمداستىرۋ» اتتى گرانتتىق يننوۆاتسيالىق جوبانى جۇزەگە اسىرۋدا.