07:59, 18 - قاڭتار 2019 | GMT +6
دوحا-الماتى-گونكونگ باعدارىمەن تۇڭعىش جۇك رەيسى ۇشىرىلدى
استانا. قازاقپارات - يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتى دوحا-الماتى-گونكونگ باعدارى بويىنشا تۇڭعىش رەت جۇك رەيسى جاسالعانىن ايتتى، دەپ حابارلايدى قازاقپارات.
«17- قاڭتاردا جۇك اۋە تاسىمالىن دامىتۋ جانە قازاقستاندى ءىرى اۆياتسيالىق حاب رەتىندە قالىپتاستىرۋ ماقساتىندا ايماقتا تۇڭعىش رەت Qatar Airways اۋە كومپانياسىنىڭ دوحا-الماتى-گونكونگ باعدارى بويىنشا بوينگ-777 اۋە كەمەسىمەن جۇك رەيسى ورىندالدى»، - دەلىنگەن كوميتەتتىڭ فەيسبۋكتەگى پاراقشاسىندا.
ازاماتتىق اۆياتسيا كوميتەتى بۇل قادامنىڭ قازاقستان ءۇشىن ماڭىزى زور ەكەنىن العا تارتادى.
«جاڭا باعىت قازاقستاننىڭ ترانزيتتىك الەۋەتىن دامىتۋ بويىنشا «نۇرلى جول» باعدارلاماسىنىڭ ماقساتتارى مەن تاپسىرمالارىنا ساي كەلەدى. سونىمەن بىرگە، بۇل جۇمىس ءبىزدىڭ ەل ارقىلى ترانزيتتىك جۇك تاسىمالىنىنڭ وسىمىنە جانە ەكونوميكانىڭ قاجەتتىلىگىن قاناعاتتاندىرۋعا وڭ اسەرىن تيگىزەدى»، - دەدى كوميتەتتەن.