داۋرەن ابايەۆ: ينسپەكتور ەرلان نۇرعاليەۆتى مەملەكەتتىك ناگراداعا ۇسىنۋدى قولدايمىن

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ قاراعاندى وبلىسىندا براكونەرلەرمەن الىسىپ، قازا تاپقان ەرلان نۇرعاليەۆتىڭ ەرلىگىنە قاتىستى پىكىرىن ءبىلدىردى، دەپ حابارلايدى قازاقپارات ءتىلشىسى.

وسى اپتادا تابيعات قورعاۋشى ەرلان نۇرعاليەۆتى ءولتىرىپ كەتكەن براكونەرلەردىڭ ارەكەتى ءدۇيىم جۇرتتى دۇرلىكتىرگەنى بەلگىلى. «حابار» ارناسىنداعى «اشىق ديالوگ» باعدارلاماسى بارىسىندا جۇرگىزۋشى وسى وقيعاعا بايلانىستى ءمينيستردىڭ پىكىرىن سۇرادى.

«ازاماتتار ايىپتىلاردى قاتاڭ جازالاۋدى تالاپ ەتىپ وتىر. حالىقتىڭ تاعى ءبىر بولىگى ينسپەكتوردى ءولتىرىپ كەتكەندەر ىقپالدى ادامدار بولىپ شىعىپ، جازادان قۇتىلىپ كەتۋى مۇمكىن ەكەنىن جازۋدا. وسىعان نە دەر ەدىڭىز ؟»، - دەدى جۇرگىزۋشى.

بۇل سۇراققا جاۋاپ بەرەر الدىندا داۋرەن ابايەۆ ەڭ الدىمەن ومىردەن وتكەن ەرلان نۇرعاليەۆتىڭ تۋعان-تۋىستارىنا كوڭىل ايتتى.

«ءوز ىستەرىن باتىلدىقپەن اتقاراتىن ادامداردىڭ ەرلىگىن كەيدە كەزدەستىرىپ جاتامىز. مەنىڭ ويىمشا، ءومىردىڭ ءوزى ۇلكەن جەتىستىكتەردىڭ ارتىندا ەرلان نۇرعاليەۆ سەكىلدى قاراپايىم ءارى مىقتى ازاماتتار تۇرعانىن كەزەكتى رەت دالەلدەپ بەردى. وتكەن اپتادا ەستەرىڭىزدە بولسا، قازاقستانداعى كيىكتەردىڭ سانى 40 پايىزعا ارتقانىن ايتىپ جاتقان ەدىك. ەندى ءبىز وسىنداي كورسەتكىشكە ەرلان نۇرعاليەۆ سەكىلدى ازاماتتاردىڭ ارقاسىندا قول جەتكىزىلىپ وتىرعانىن كورىپ وتىرمىز»، - دەدى داۋرەن ابايەۆ.

مينيستر ءوز جاۋابىندا اتالمىش وقيعاعا بايلانىستى قىلمىستىق ءىستىڭ بارىسىن باس پروكۋراتۋرانىڭ باقىلاۋىنا العانىن اتاپ ءوتتى.

بۇل ءىس بويىنشا قازىرگى تاڭدا ىشكى ىستەر ورگاندارىنىڭ ۇزدىك ماماندارى جۇمىس جۇرگىزىپ جاتىر.

«كىنالىلەر قازاقستان رەسپۋبليكاسىنىڭ زاڭناماسىنا ساي قاتاڭ جازاسىن الارىنا تولىق سەنىمدىمىن»، - دەدى ول.

داۋرەن ابايەۆتىڭ ايتۋىنا قاراعاندا، وسى جاعدايدان كەيىن تابيعات قورعاۋ سالاسىنداعى جۇمىستارعا ءبىرشاما وزگەرىستەر ەنگىزىلۋى مۇمكىن. مينيستر كەلتىرگەن دەرەككە سۇيەنسەك، وتكەن جىلى قازاقستانداعى كيىكتەردى كۇزەتۋگە 200 ينسپەكتور جۇمىلدىرىلعان.

«ءبىراق، ءبارى ناشار دەپ تە ايتۋعا كەلمەيدى. 15 جىل بۇرىن عانا كيىكتەر مەن ەلىكتەر، قوقيقازدار جاپپاي اۋلانىپ جاتاتىن. بۇعان نەگىزىنەن تابيعات قورعاۋ ينسپەكتسياسىنىڭ تەحنيكالىق تۇرعىدا از قامتىلۋى سەبەپ بولعانى جاسىرىن ەمەس. سونىمەن بىرگە، كوپتەگەن ىستەر ناقتى ۇكىمدى ايتپاعاندا سوتقا دەيىن دە جەتپەيتىن. بۇگىنگى تاڭدا جاعداي مۇلدە بولەك. جانۋارلار الەمىنىڭ كۇزەت قىزمەتى زاماناۋي اۆتوكولىك، قاركەشكىش تەحنيكامەن، موتوتسيكلمەن قامتىلعان. البەتتە، ول تەحنيكالاردى ءاردايىم جاقسارتىپ وتىرۋ كەرەك. سوتقا دەيىن جەتكەن ىستەر تۋرالى ايتار بولساق، وتكەن جىلى عانا براكونەرلەردەن 350 ميلليون تەڭگە وندىرىلگەن. ونداعان ادامعا شىنايى ۇكىم شىققان»، - دەدى ول.

سونىمەن بىرگە، مينيستر ەرلان نۇرعاليەۆكە قايتىس بولعاننان كەيىن مەملەكەتتىك ناگرادا بەرۋ باستاماسىن قولدايتىنىن جەتكىزدى.

«ءيا، قازاقستان رەسپۋبليكاسىنىڭ ازاماتى رەتىندە مەن بۇل باستامانى تولىعىمەن قولدايمىن»، - دەپ ءتۇيدى داۋرەن ابايەۆ.

ەستەرىڭىزگە سالا كەتسەك، وسىدان بىرنەشە كۇن بۇرىن 5 كيىك اتقان براكونەرلەرمەن قاقتىعىستا اۋىر جاراقات العان «وحوتزووپروم» ءو ب» ر م ق ك ينسپەكتورى ەرلان نۇرعاليەۆ 15- قاڭتاردا استانانىڭ 1№ اۋرۋحاناسىندا قايتىس بولعان ەدى.

ال ق ر ىشكى ىستەر ءمينيسترى قالمۇحانبەت قاسىموۆ جاراقات العان «وحوتزووپروم» ينسپەكتورىن قۇتقارۋعا نەلىكتەن كوپ ۋاقىت كەتكەنىن ءتۇسىندىردى.