بيىل ۇلتتىق ءبىرىڭعاي تەستىلەۋدى تاپسىرۋشىلار نەنى ءبىلۋى كەرەك؟
بۇل تۋرالى قازاقپارات ق ر ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
بيىلدان باستاپ جوعارى وقۋ ورنىنا اقىلى نەگىزدە ءتۇسۋ ءۇشىن ۇ ب ت- نى جىلىنا 4 رەت (قاڭتار، ناۋرىز، ماۋسىم، تامىز) تاپسىرۋعا بولادى. ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن وقۋعا تۇسۋشىلەر ماۋسىم ايىندا وتەتىن ۇ ب ت- نى تاپسىرۋى قاجەت. جالپى، سىناقتى تاپسىرۋ فورماتىندا وزگەرىس جوق. بۇل نورما جوعارى ءبىلىم الۋعا قولجەتىمدىلىكتى ارتتىرۋ ماقساتىندا ەنگىزىلدى.
«ۇ ب ت- عا قاتىسۋ ءۇشىن قۇجاتتاردى قابىلداۋ ءبىرىڭعاي اقپاراتتىق جۇيە ارقىلى 2018-جىلعى 1-15- جەلتوقسان ارالىعىندا جۇزەگە اسىرىلدى. ناتيجەسىندە، تەستىلەۋگە قاتىسۋعا 35838 ادام ءوتىنىش ءبىلدىردى، ونىڭ ىشىندە، قازاق تىلىندە - 25615، ورىس تىلىندە - 10162، اعىلشىن تىلىندە - 61 وقۋشى. 2018-جىلى اعىلشىن تىلىندە تەك، 28 قاتىسۋشى ءبىلىمىن سىناعانىن اتاپ وتكەن ءجون. تەستىلەۋدى اعىلشىن تىلىندە تاپسىرۋشىلار سانىنىڭ كوبەيۋى جىلدان-جىلعا وقۋشىلاردىڭ شەت ءتىلدى مەڭگەرۋ دەڭگەيىنىڭ ارتقاندىعىن كورسەتەدى. بۇل كورسەتكىشكە ەلىمىزدە كوپتىلدى ءبىلىم بەرۋ ساياساتىنىڭ ەنگىزىلۋى مەن جاستاردىڭ ءبىلىم كەڭىستىگىندە الەمدىك ترەندتەردەن قالىسپاۋعا دەگەن ىنتاسىنىڭ ارقاسىندا جەتىپ وتىرمىز»، - دەلىنگەن حابارلامادا.
ۇلتتىق ءبىرىڭعاي تەستىلەۋگە جالپى ءبىلىم بەرەتىن مەكتەپتەردىڭ 11 (12) سىنىپ وقۋشىلارى، ءبىرىنشى اكادەميالىق وقۋ كەزەڭىن اياقتاعانعا دەيىن (شارتتى تۇردە قابىلدانعان) ج و و- عا قابىلدانعان تۇلعالار، سونداي-اق، شىعارماشىلىق ماماندىقتاردا وقيتىن جانە باسقا ماماندىقتارعا اۋىسۋعا نيەت بىلدىرگەن ستۋدەنتتەر قاتىسادى.
وڭىرلەرگە قازاقستان رەسپۋبليكاسى ءبىلىم جانە عىلىم مينيسترلىگىنىڭ 309 وكىلى جىبەرىلىپ، اپەللياتسيالىق كوميسسيالار قۇرىلدى، مەديتسينالىق كومەك كورسەتۋ پۋنكتتەرى ۇيىمداستىرىلدى جانە تەستىلەۋ بارىسىندا قاۋىپسىزدىك قامتاماسىز ەتىلدى. سونىمەن قاتار، ەرەكشە ءبىلىم بەرۋ قاجەتتىلىگى بار بالالارعا قاجەت بولعان جاعدايدا جەكە كومەكشىلەر، سونداي-اق، سۋردو اۋدارماشىلار ۇسىنىلاتىن بولادى.
ۇ ب ت وتكىزۋ ءۇشىن جەرگىلىكتى جەرلەردە 444 ادامنان تۇراتىن ۇيىمداستىرۋ جانە وتكىزۋ بويىنشا مەملەكەتتىك كوميسسيا قۇرىلدى. ونىڭ قۇرامىنا وبلىستار نەمەسە رەسپۋبليكالىق ماڭىزى بار قالالاردىڭ اكىمدىكتەرىنىڭ وكىلدەرى، قۇقىق قورعاۋ ورگاندارىنىڭ، قوعامدىق ۇيىمداردىڭ، بۇقارالىق اقپارات قۇرالدارىنىڭ وكىلدەرى كىرەدى.