جانداربەك بەكشين: تۇرعىندار مىندەتتى تۇردە قىزىلشاعا قارسى ەكپە جاساتۋى كەرەك
ال قازاقستانداعى بۇل باعىتتاعى احۋال قانداي؟ ول تۋرالى و ك ق- دا وتكەن باسپا ءسوز ءماسليحاتىندا ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ ءتوراعاسى - باس مەملەكەتتىك سانيتار دارىگەر جانداربەك بەكشين ايتىپ بەردى، دەپ حابارلايدى قازاقپارات ءتىلشىسى.
«ءبىزدى الاڭداتاتىنى - قىزىلشا اۋرۋى. بىلەتىندەرىڭىزدەي، قىزىلشا بۇكىل الەمدىك ماسەلە. نەگە دەسەڭىز، الەمدە بارلىق ەلدەردە 300 مىڭنان استام قىزىلشامەن اۋرۋ جاعدايى تىركەلدى. ونىڭ ىشىندە تەك ەۋروپا ەلدەرىندە 70 مىڭنان استام ادام قىزىلشا جۇقتىرعان. ءبىزدىڭ زەرتتەۋىمىز بويىنشا، قازىرگى تاڭدا ءدال وسى ەۋروپا ەلدەرىندەگى قىزىلشانىڭ تۇرلەرى تىركەلىپ جاتىر. بۇل - ءبىزدىڭ جاسالعان تالداۋىمىز. نەگە دەسەڭىز، ءبىزدىڭ ەلىمىزدىڭ تۇرعىندارى قارىم-قاتىناس بويىنشا كوپتەپ ساياحاتقا شىعادى، ءىس ساپارلارعا بارادى. وكىنىشكە قاراي، ەۋروپادا 68 جاعداي ولىممەن اياقتالعان. ءبىزدىڭ ساياحاتشىلارىمىز، تۇرعىندارىمىز جولعا شىققان كەزدە وزدەرىنىڭ جولىن جوسپارلاۋى كەرەك. نەگە دەسەڭىز، ءاربىر ازامات شىعاتىن ەلىنىڭ ەپيدەميولوگيالىق احۋالىن ءبىلىپ الۋى ءتيىس. بالالارى قىزىلشا بويىنشا ەگىلمەسە، مىندەتتى تۇردە ەكپە جاساتۋ كەرەك»، - دەيدى جانداربەك بەكشين.
ونىڭ ايتۋىنشا، قىزىلشا بويىنشا سەربيا ەلىندە 5 مىڭنان استام، يتاليا مەن فرانسيادا 3 مىڭداي، ۋكراينادا 38 مىڭداي، ۇلى بريتانيادا 1 مىڭعا جۋىق جاعداي تىركەلگەن. ءبىزدىڭ ەڭ جاقىن كورشىلەرىمىز - قىرعىزستاندا 1,5 مىڭ جانە رەسەيدە 4 مىڭداي جاعداي انىقتالعان.
«سول سەبەپتى، ءبىز وسى باعىتتا جۇمىستى جوسپارلاپ، الدىن الۋ شارالارىن جۇرگىزىپ جاتىرمىز. الدىن الۋ شارالارى قازىرگى تاڭدا ورىندالۋدا. قازىرگى تاڭدا بىزدە ەگۋ ءۇشىن ۆاكتسينا كولەمى تولىعىمەن قامتىلدى. ەلىمىزدە تۇرىپ جاتقان تۇرعىنداردى ۆاكتسيناتسياعا شاقىرامىز. بيىلعى جىلدىڭ ەرەكشەلىگى - ەگىلمەگەن ادامداردىڭ 60 پايىزى 1 جاسقا كەلگەن بالالار. ءبىزدىڭ ەلىمىزدە بالالاردىڭ ءبىرىنشى ەكپەسى 1 جاستا، ەكىنشىسى 6 جاستا جاسالادى. سوندىقتان، 12 اي جەتپەي، 6 اي، 7 اي، 8 ايدا اۋىرىپ جاتىر. سوندىقتان، ءبىز ارنايى ءىس-شارا قابىلداۋدامىز»، - دەدى جانداربەك بەكشين.
ونىڭ ايتۋىنشا، قىزىلشا ەڭ كوپ تىركەلىپ جاتقان ايماقتار - استانا، الماتى، اتىراۋ، شىمكەنت قالالارى جانە اقمولا وبلىسى. بۇل ايماقتاردا بالالاردىڭ ەگىلۋى 9 ايدان باستالادى.