ەلىمىزدىڭ باس سانيتارى قىزىلشاعا قارسى ەكپە جاساماۋدىڭ قاۋپى تۋرالى ايتتى

استانا. قازاقپارات - ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ ءتوراعاسى - باس مەملەكەتتىك سانيتار دارىگەر جانداربەك بەكشين قىزىلشاعا قارسى ەكپە جاساماۋدىڭ قاۋپى تۋرالى تارقاتىپ ايتىپ بەردى، دەپ حابارلايدى قازاقپارات ءتىلشىسى.

«مەكتەپتەردە فيلتر جاساپ، بالالاردى ادامدار كوپ جينالاتىن جەرگە اپارماۋ كەرەك. ارينە، ەڭ الدىمەن حالىق اراسىندا اعارتۋ جۇمىستارىن جۇرگىزىپ جاتىرمىز. سەبەبى، ءالى دە وسى ەكپەدەن باس تارتىپ جاتقان ازاماتتار بار. تۇرعىنداردىڭ كەيبىر بولىگى قىزىلشانى اۋرۋ دەپ سانامايدى. ال اۋرۋعا شالدىققان بالالاردىڭ دەرتى ەرتەڭ اسقىنۋى مۇمكىن. اسقىنعان ءتۇرى - پنيەۆمونيا. ەكىنشىسى - ەنتسيفاليت، برونحيت، ال ەڭ اۋىرى - پانەنتسيفاليت. بۇل اۋرۋدىڭ ەرەكشەلىگى - ينفەكتسيا ءوز-وزىنەن باسىلمايدى. كۇنى ەرتەڭ دەپرەسسيا جاعدايىندا اۋرۋ شىعىپ كەتەدى»، - دەيدى ول و ك ق- دا وتكەن باسپا ءسوز ءماسليحاتىندا.

جانداربەك بەكشين ءوز سوزىندە اتاپ وتكەندەي، قىزىلشانىڭ العاشقى سييپتومدارى - السىزدىك، تاماق پەن باستىڭ اۋرۋى، مۇرىننان سۋدىڭ اعىپ، كونيۋكتيۆيتتىڭ ءبىلىنۋى. ودان كەيىن عانا قىزىلشانىڭ ارنايى ءوزىنىڭ سيمپتومى - بورتپە شىعادى. سونىمەن بىرگە، جانداربەك بەكشين ۆاكتسيناتسيادان باس تارتاتىن اتا-انالارمەن قانداي جۇمىس اتقارىلىپ جاتقانى تۋرالى سۇراققا جاۋاپ بەردى.

«بيىل قىزىلشاعا شالدىققان ناۋقاستاردىڭ 76 پايىزى - ۆاكتسيناتسيادان وتپەگەندەر. وسى ەگىلمەگەندەردىڭ اراسىندا تاعى ءبىر سەبەپ بار. 200 دەن استام بالا ەكپە جاساتۋ جاسىنا ءالى كەلمەگەن. بىزدە ەكپە ءبىر جاستان باستالادى. قازىرگى تاڭدا اۋىرىپ جاتقان 262 بالانىڭ جاسى - التى، جەتى، سەگىز ايلىق بالالار. وسى سانداردىڭ ىشىندە 45 ءى ەكپەدەن باس تارتقانداردىڭ بالالارى. سەبەبى، ولاردىڭ اتا-انالارىنىڭ ءبىلىمى تومەن بولۋىنا بايلانىستى بالالار اۋىرىپ جاتىر. سول سەبەپتى، جۇكتى ايەلدەر كەلەشەكتە مىندەتتى تۇردە ۆاكتسينا الۋى كەرەك. قورعانىس يمۋنيتەتى بالاعا قانمەن جانە سۇتپەن بەرىلەدى»، - دەيدى ول.

ەسكە سالا كەتسەك، جانداربەك بەكشين بۇدان بۇرىن تۇرعىندار مىندەتتى تۇردە قىزىلشاعا قارسى ەكپە جاساتۋى كەرەكتىگىن حابارلاعان بولاتىن.