ۆيتسە-مينيستر جەدەل جاردەم قىزمەتكەرلەرىنە جاسالاتىن شابۋىلعا قاتىستى پىكىر ءبىلدىردى

استانا. قازاقپارات - ق ر دەنساۋلىق ساقتاۋ ۆيتسە-ءمينيسترى الەكسەي تسوي جەدەل جاردەم قىزمەتكەرلەرىنە جاسالاتىن شابۋىلعا قاتىستى پىكىر ءبىلدىرىپ، ماسەلەنىڭ قالاي شەشىلىپ جاتقانىن ايتتى، دەپ حابارلايدى قازاقپارات ءتىلشىسى.

ايتا كەتسەك، ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا الەكسەي تسويعا جەدەل جاردەم قىزمەتكەرلەرىنىڭ زارداپ شەگىپ جاتاتىنىنا قاتىستى سۇراق قويىلعان ەدى.

«15- قاڭتاردا استانادا جەدەل جاردەم بريگاداسىنا شابۋىل جاسالدى. سول كەزدە فەلدشەردىڭ باسىنان جاراقاتتانعانى بەلگىلى بولىپ وتىر. وسى جاعدايعا بايلانىستى قانداي اقپاراتتارىڭىز بار؟ مۇنداي جاعدايلار ەلىمىزدە قانشالىقتى ءجيى كەزدەسەدى؟ بۇل ماسەلەمەن قالاي كۇرەسۋگە بولادى؟» - دەگەن سۇراق قويىلدى الەكسەي تسويعا.

ۆيتسە-مينيستر بۇل سۇراققا جاۋاپ بەرە كەلە، وكىنىشكە قاراي، ونداي جاعدايلار كەزدەسەتىنىن ايتتى.

«دەنساۋلىق ساقتاۋ بولسىن، باسقا سالا بولسىن مۇنداي جاعدايلار تىركەلىپ جاتادى. قۇقىق قورعاۋ ورگاندارى مۇنداي جاعدايلارعا ءوز باعاسىن بەرە جاتار. بىزدە زاڭناما بويىنشا قىلمىستىق كودەكستە دە، اكىمشىلىك قۇقىقبۇزۋشىلىق كودەكسىندە دە بۇل تۇرعىدا جاۋاپكەرشىلىك قاراستىرىلعان. سوندىقتان، بۇل قۇقىقتىق الاڭ. البەتتە، بۇل ءبىزدى قۋانتپايدى. بالكىم، ادامدار ەموتسيونالدى بولۋى نەمەسە باسقا جاعدايدا ادامدار اشۋعا بەرىلۋى مۇمكىن. بۇدان ەشكىم دە ساقتاندىرىلماعان. وكىنىشكە قاراي، وسىنداي جاعدايلار كەزدەسەدى. ءبىراق، مۇنداي ۋاقىتتا بىزگە قۇقىق قورعاۋ ورگاندارىنىڭ ادامدارى كەلىپ، ىسكە ءوز باعاسىن بەرەدى»، - دەپ جاۋاپ بەردى الەكسەي تسوي.

ەسكە سالا كەتسەك، و ك ق- دا وتكەن باسپا ءسوز ءماسليحاتىندا ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتىنىڭ ءتوراعاسى - باس مەملەكەتتىك سانيتار دارىگەر جانداربەك بەكشين تۇرعىندار مىندەتتى تۇردە قىزىلشاعا قارسى ەكپە جاساتۋى كەرەكتىگىن حابارلاعان بولاتىن.