مەملەكەتتىك كىرىستەر كوميتەتىنىڭ قىزمەتكەرلەرى شەكارادا تاۋار تەكسەرەدى
ولار ەكسپورتقا شىعاتىن جانە يمپورتپەن كەلەتىن تاۋارلاردى تەكسەرىپ وتىرادى، دەپ حابارلايدى قازاقپارات ءتىلشىسى.
كوميتەتتىڭ ەكسپورتتىق باقىلاۋ باسقارماسىنىڭ جەتەكشىسى ءانۋار ماديەۆتىڭ ايتۋىنشا، كەشەدەن بەرى 37 اۆتوبەكەتتە 277 ادام جۇمىس ىستەپ ءجۇر. ولارعا بىرنەشە مىندەت جۇكتەلگەن. بىرىنشىدەن، كوميتەت قىزمەتكەرلەرى ەكسپورتتىق باقىلاۋعا جاتاتىن تاۋارلاردى قاداعالايدى. ەكىنشىدەن، باجدىڭ تومەندەتىلگەن مولشەرلەمەسىنە كىرەتىن تاۋارلاردى تەكسەرەدى. ونداي تاۋارلارعا 3 مىڭعا جۋىق ءونىم كىرەدى. ۇشىنشىدەن، ەۋرازيالىق ەكونوميكالىق وداق اياسىندا تاۋارلاردى ساتۋ، جۇمىستاردى ورىنداۋ جانە قىزمەت كورسەتۋ كەزىندە يمپورتقا قوسىلعان قۇن سالىعىنىڭ تولىق ءتۇسۋىن باقىلايدى.
«بۇدان بولەك، بۇگىندە قازاقستان اۋماعىنان اۆتوكولىكپەن قارا جانە ءتۇستى مەتالداردى شىعارۋعا تىيىم سالىنعان. مەملەكەتتىك كىرىستەر كوميتەتىنىڭ قىزمەتكەرلەرى وسى ماسەلەنى دە ءجىتى قاداعالاپ وتىرادى. بۇعان دەيىن ءبىز باتىس قازاقستان وبلىسىنداعى «سىرىم» اۆتوبەكەتىندە پيلوتتىق رەجيمدە جۇمىس ىستەپ كوردىك. سول كەزدە جۇك تاسىمالداۋشىلار تاراپىنان نارازىلىق بولدى. سوندىقتان الداعى ۋاقىتتا تۇسىنىسپەۋشىلىكتەر بولماسىن دەپ، بارلىق يمپورتتاۋشىلار مەن ەكسپورتتاۋشىلارعا الدىن الا حابار بەرگىمىز كەلىپ وتىر»، - دەدى ءا. ماديەۆ استانادا وتكەن باسپا ءسوز ءماسليحاتىندا.
ونىڭ ايتۋىنشا، مەملەكەتتىك كىرىستەر كوميتەتىنىڭ شتاتى كەڭەيتىلگەن جوق. شەكاراعا جىبەرىلگەن بارلىق قىزمەتكەرلەر كوميتەتتە جانە جەرگىلىكتى جەردە بۇرىننان بەرى جۇمىس ىستەپ ءجۇر.
«وسىدان باستاپ مەملەكەتتىك كىرىستەر كوميتەتىنىڭ قىزمەتكەرلەرى شەكارادا تۇراقتى تۇردە جۇمىس ىستەيتىن بولادى. وسىعان وراي، جەرگىلىكتى دەپارتامەنتتەردە ەكسپورتتىق باقىلاۋ باسقارمالارى قۇرىلدى. ءبىز شتاتتى كەڭەيتكەن جوقپىز»، - دەپ اتاپ كورسەتتى ءا. ماديەۆ.