دەنيس تەن ولىمىنە ايىپتىلار سوتتالدى

الماتى. قازاقپارات - الماتىدا ءوتىپ جاتقان دەنيس تەننىڭ ءولىمى بويىنشا سوت ءبىر ايعا جەتپەي ءوز مارەسىنە جەتتى.

بۇگىن ايىپتىلارعا سوت ۇكىمى شىقتى، دەپ حابارلايدى قازاقپارات ءتىلشىسى سوت زالىنان.

سۋديا كەڭشىلىك ءابىلدينوۆ ق ر ق ك 188-بابىنىڭ 2-ءبولىمىنىڭ 2- تارماعى، ق ر ق ك 99-بابىنىڭ 2-بولىمىمەن، 192-بابىنىڭ 2-ءبولىمىنىڭ 1,4-تارماقتارىمەن قىلمىستىق جاۋاپكەرشىلىككە تارتىلعان ارمان قۇدايبەرگەنوۆتى 18 جىلعا باس بوستاندىعىنان ايىرىپ، جازاسىن قىلمىستىق اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەۋگە ۇكىم ەتتى.

نۇرالى قياسوۆتى ق ر ق ك 99-بابىنىڭ 2-بولىمىمەن، 192-بابىنىڭ 2-بولىمىمەن ايىپتى دەپ تاۋىپ، 18 جىلعا باس بوستاندىعىنان ايىرىپ، جازاسىن قىلمىستىق اتقارۋ جۇيەسىنىڭ قاۋىپسىزدىگى جوعارى مەكەمەسىندە وتەۋگە ۇكىم ەتتى.

ق ر ق ك 434-بابىمەن ايىپتالعان جانار تولىبايەۆانى 4 جىلعا باس بوستاندىعىنان ايىرىپ، جازاسىن قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋگە ۇكىم ەتتى. سوت تولىبايەۆانى ق ر ق ك 188-بابىنىڭ 2-ءبولىمى بويىنشا اقتاۋ تۋرالى شەشىم شىعاردى.

ەسكە سالساق، قازاقستاندىق مانەرلەپ سىرعاناۋشى دەنيس تەن 19- شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا 19- شىلدەدە تۇسكى ساعات 15:00 دەر شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنان جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى.

ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن. 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17:30 دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى. كەيىن بەلگىلى بولعانداي، سپورتشىنىڭ ولىمىنە قاتىسى بار كۇدىكتىلەر ۇستالىپ، قىلمىستارىن مويىندادى.