اقبوكەندەرگە اراشا تۇسەمىن دەپ قازا تاپقان ينسپەكتوردىڭ سۋرەتى جۇرتتىڭ كوڭىلىن بوساتتى
ءى ءى م- ءنىڭ مالىمەتىنشە، ينسپەكتورلاردى سوققىعا جىعىپ، قانسىراعان كۇيى دالاعا تاستاپ كەتكەندەر انىقتالعان. تەك ولاردى ۇستاۋ عانا قالىپتى.
قۇزىرلى ورگان تەرگەۋ قۇپيالىعىنا بايلانىستى وزگە اقپارات بەرىلمەيدى دەپ وتىر. دەگەنمەن باس پروكۋروردىڭ ورىنباسارى تەرگەۋدى ءجىتى باقىلاۋعا العاندارىن ايتادى.
«كىم جانە دارەجەسى قانداي ەكەنىنە قاراماستان وسى باپتىڭ اياسىندا قاتاڭ جازاعا تارتىلادى. ويتكەنى ءىستى ىشكى ىستەر ءمينيسترى مەن باس پروكۋراتۋرا باقىلاۋعا ۇستاپ وتىر. ءى ءى م ورتالىق اپپاراتىنان ارنايى توپ جاساقتالىپ قاراعاندىعا جىبەرىلدى. قازىر ولار جان-جاقتى تەرگەۋگە ارالاسىپ جاتىر»، - دەدى باس پروكۋروردىڭ ورىنباسارى اندرەي لۋكين.
تابيعات قورعاۋشىلارىنىڭ ايتۋىنشا، كەيىنگى كەزدە براكونەرلەر كوبەيىپ كەتكەن. 2018-جىلدىڭ وزىندە كيىك اتقاندارعا قاتىستى 50 قىلمىستىق ءىس قوزعالىپتى. ۇستاتپاي كەتكەندەرى ءبىرشاما ەكەندىگىن دە جەتكىزدى.
«وحوتزووپروم» ق م م ديرەكتورىنىڭ ورىنباسارى جانات تاڭسىقبايەۆتىڭ ايتۋىنشا، ينسپەكتوردىڭ باقىلاۋعا الاتىن اۋماعىن ازايتۋدى زاڭمەن بەكىتۋ كەرەك. ناتيجەسىندە ينسپەكتورلاردىڭ سانى ارتادى. سونىمەن قاتار ولارعا برونەجيلەت، كاسكا كيگىزىپ، ۇستايتىن قارۋلارىنىڭ دا سانىن ارتتىرۋ كەرەك دەپ وتىر.
ايتا كەتەيىك، براكونەرلەردىڭ قولىنان قازا تاپقان تابيعات قورعاۋ ينسپەكتورى بۇگىن جەر قوينىنا تاپسىرىلادى. 53 جاستاعى ەرلان نۇرعاليەۆ وسى قىزمەتتە 2012-جىلدان بەرى تەر توگىپ كەلگەن.
ال مارقۇمنىڭ قازاسىنا قايعىرعان قازاقستاندىقتار ەرلان نۇرعاليەۆتىڭ جانتەبىرەنتەرلىك فوتوسىن جەلىدە جاريالاۋدا.
ەسكە سالا كەتەيىك، «وحوتزووپروم» كومپانياسىنىڭ ەكى قىزمەتكەرىنە براكونەرلەر شابۋىل جاساعان بولاتىن. بۇل وقيعا قاراعاندى وبلىسىنداعى ينسپەكتورلاردان قاشىپ كەتپەك بولعان قاسكۇنەمدەردىڭ ىزىنە ءتۇسۋ كەزىندە ورىن العان.
ناتيجەسىندە قىزمەتكەرلەردىڭ ءبىرى ەرلان نۇرعاليەۆ اۋرۋحانادا كوز جۇمدى. ال ءتىرى قالعان قاراعاندىلىق ينسپەكتور وقيعانى بايانداپ بەرگەن ەدى.