عالامنىڭ «ۇزدىك» داۋىسى: ديماشتىڭ جانكۇيەرلەرى سوتقا جۇگىنبەكشى

استانا. قازاقپارات - ايگىلى قازاقستاندىق ءانشى ديماش قۇدايبەرگەنوۆ «عالامنىڭ ۇزدىك داۋىسى» دەگەن امەريكالىق شوۋدا باق سىناۋدا.

كۇنى كەشە داۋىس بەرۋ ناتيجەسى بويىنشا 2-ورىندا تۇرعان ديماش قۇدايبەرگەن بۇگىن 369-ورىنعا ءبىر-اق تۇسكەن. مۇنى كورگەن ءانشىنىڭ فاناتتارى Ranker رەيتينگتەر سايتىن سوتقا بەرمەك دەپ جازادى NUR. KZ.

وسىدان بىرنەشە كۇن بۇرىن الەمنىڭ ەڭ ۇزدىك داۋىسىن انىقتاۋ ءۇشىن ranker.com سايتىندا داۋىس بەرۋ باستالىپ كەتتى.

قازاقستاندىق ءانشى ديماش قۇدايبەرگەن داۋىس بەرۋ جابىلۋىنا بىرنەشە ساعات قالعاندا 2-ورىندا تۇرعان. ول داۋىس سانى جاعىنان تەك فرەددي مەركيۋريگە جول بەرىپتى. ال ديماشقا الەمنىڭ تۇپكىر-تۇپكىرىنەن 90 مىڭ ادام داۋىس بەرگەن.

ال داۋىس بەرۋ اياقتالعان ساتتە قازاقستاندىق ءانشى ديماش قۇدايبەرگەن 369-ورىنعا ءبىر-اق قۇلاعان. ءانشىنىڭ 90 مىڭ ءلۇپىلىنىڭ 16 مىڭى عانا قالعان. ال ءانشىنى ۇناتپاعاندار (ديزلايك) سانى 113 مىڭعا جەتكەن.

مۇنداي ناتيجە كۇتپەگەن ديماش قۇدايبەرگەننىڭ تىڭدارماندارى سايت ۇيىمداستىرۋشىلارىنا الەمنىڭ تۇپكىر-تۇپكىرىنەن تەرىس پىكىردى قارشا بوراتۋدا.

«ديماشتىڭ لايكتارىن ديزلايكتارعا اۋىستىرىپ جىبەرگەن». «قانداي باسسىزدىق؟ 105 مىڭنان اسا داۋىس جيناپ تۇرعان ادامدى قالاي 369-ورىنعا ءتۇسىرىپ جىبەرۋگە بولادى؟ ديماشقا مۇنداي داۋىس بەرىلەدى دەپ كۇتپەگەن بولار. سايتتىڭ ماسقاراسى شىقتى عوي». «تۇندە قاراعانىمدا ديماشتىڭ داۋىسى بارىنەن كوپ بولاتىن. بۇل ارانداتۋ ەكەنى انىق». «سىزدەر لايك پەن ديزلايكتىڭ ورنىن اۋىستىرىپ، ديماشتى 369-ورىنعا قۇلاتتىڭىزدار. سايتتىڭ بۇل العاشقى قۇيتىرقىلىعى ەمەس».

سونىمەن قاتار ءانشىنىڭ تىڭدارماندارى سايت اكىمشىلىگىنەن تۇسىنىك بەرۋدى تالاپ ەتتى. ەگەر ولاي بولماعان جايعدايدا ديماش قۇدايبەرگەننىڭ تىڭدارماندارى ۇيىمداستىرۋشىلاردى سوتقا بەرمەك.