قازاقستاندا «نۇرلى جەر» باعدارلاماسى اياسىندا قانشا بولمەلى پاتەرگە سۇرانىس جوعارى؟
بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا «قازاقستاننىڭ تۇرعىن ءۇي قۇرىلىس جيناق بانكى» باسقارماسىنىڭ ءتوراعاسى ءلاززات يبراگيموۆا ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، 2019-جىلى بانك ءوز سالىمشىلارىن «نۇرلى جەر» باعدارلاماسى بويىنشا 59,7 ميلليارد تەڭگەگە نەسيەلەندىرەدى.
«مەملەكەت باسشىسى قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جىل سايىنعى جولداۋىندا «نۇرلى جەر» باعدارلاماسىن وڭ باعالادى. باعدارلاما تۇرعىن ءۇي قۇرىلىسىنا قۋاتتى سەرپىن بەردى جانە مىڭداعان قازاقستاندىقتىڭ باسپانالى بولۋىنا كومەكتەستى. ونىڭ كومەگىمەن جەرگىلىكتى اكىمشىلىكتەردە كەزەكتە تۇرعان، بيۋجەتتىك سالادا جۇمىس ىستەيتىن جانە تابىسى نارىقتان تۇرعىن ءۇي ساتىپ الۋعا جەتپەيتىن تۇرعىنداردىڭ جەڭىلدەتىلگەن باعامەن پاتەر ساتىپ الا الادى. مەملەكەتتىك باعدارلاما اياسىندا ورتاشا زايم سوماسى 7,3 ميلليون تەڭگەگە تەڭ كەلەدى. باعدارلاماعا قاتىسۋشىلار اراسىندا ەكى بولمەلى پاتەرگە دەگەن سۇرانىس جوعارى»، - دەدى ءلاززات يبراگيموۆا.
ال ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنبايەۆتىڭ ايتۋىنشا، «7-20-25» باعدارلاماسىن ءتيىمدى ىسكە اسىرۋ ءۇشىن «نۇرلى جەر» باعدارلاماسىنا وزگەرىستەر ەنگىزىلدى. «نۇرلى جەر» باعدارلاماسى بويىنشا اكىمدىكتەر سالعان تۇرعىن ۇيلەردى «7-20-25» باعدارلاماسىنىڭ قاتىسۋشىلارى مەن تۇرعىن ءۇي قۇرىلىس جيناق بانكىنىڭ سالىمشىلارىنا قاتار بەرۋ قاراستىرىلدى. سونىمەن بىرگە، «نۇرلى جەر» باعدارلاماسىنىڭ قاتىسۋشىلارى ءۇشىن باستاپقى جارنانىڭ مولشەرى 30 پايىزدان 20 پايىزعا دەيىن تومەندەتىلىپ، تۇرعىن ءۇي قۇرىلىس جيناق بانكىنەن قارىز الۋ قولجەتىمدىلىگى ارتتى»، - دەدى ول.