ەكسپو- قالاشىق پاتەرلەرىن ساتۋ نەلىكتەن توقتاتىلعانى بەلگىلى بولدى

استانا. قازاقپارات - ەكسپو- قالاشىق پاتەرلەرىن ساتۋ تەتىكتەرىنە وزگەرتۋلەر ەنگىزىلدى. بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا قر يندۋستريا جانە ينفراقۇرىلىمدىق دامۋ ۆيتسە- ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.

«بايتەرەك ديەۆولوپمەنت» حولدينگى اتالعان پاتەرلەردىڭ مەنشىك يەسى سانالادى. بۇعان دەيىن ولار پاتەرلەردى اشىق ساتىلىمعا شىعارعان بولاتىن. جىلجىمايتىن مۇلىك قۇنىنىڭ بارىنشا جوعارى بولۋىن بايلانىستى ادامدار كەلىپ، بىردەن ەسەپ ايىرىسۋى ءۇشىن بىررەتتىك اشىق ساتىلىم جاسالدى. الايدا جاپپاي ساتىلىم ورىن العان جوق. سوندىقتان قازىرگى ۋاقىتتا «بايتەرەك ديەۆەلوپمەنت» اتالعان پاتەرلەردى ساتۋ تەتىكتەرىن قايتا قاراستىردى»، - دەدى ول.

ونىڭ ايتۋىنشا، حولدينگ تاياۋ ارادا باسپا ءسوز ءماسليحاتىن وتكىزىپ، پاتەرلەردى ساتۋ تەتىكتەرىن جاريا ەتەدى.

«ولاردىڭ الدىن الا ايتۋىنشا، 12 جىلعا ءۇش پايىزبەن بەرىلمەك. العاشقى جارنا - 20 پايىز. ياعني، ولار دا شارتتارىن «7-20-25» باعدارلاماسىنا سايكەستەندىرىپ وتىر. قازاقستاننىڭ بارلىق بانكتەرى، بارلىق سالىمشىلار قاتىسا الادى. ولار ازىرشە وسىلاي جوسپارلاپ وتىر»، - دەدى قايىربەك وسكەنبايەۆ.

بۇعان دەيىن «بايتەرەك ديەۆەلوپمەنت» استاناداعى ەكسپو اۋماعىنداعى پاتەرلەردى ساتىپ الۋعا وتىنىشتەردى قابىلداۋ ۋاقىتشا توقتاتىلعانىن حابارلاعان بولاتىن.